ខ្សែភាពយន្តឯកសារ «LOOT: ការវិលត្រឡប់មកវិញនូវរតនសម្បត្តិវត្ថុកម្ពុជា» ត្រៀមចាក់បញ្ចាំងនៅតាមរោងភាពយន្តទូទាំងប្រទេសកម្ពុជា ចាប់ពីថ្ងៃទី១៦ ខែតុលា ឆ្នាំ២០២៦

ភ្នំពេញ ៖ ខ្សែភាពយន្តឯកសារកម្រិតអន្តរជាតិ “LOOT” ដែលលាតត្រដាងពីបណ្តាញឧក្រិដ្ឋកម្មជួញដូរវត្ថុបុរាណខ្មែរជាសកល ដោយខុសច្បាប់ពីសំណាក់ជនបរទេស ត្រូវបានក្រុមហ៊ុន AMS (Apsara Media Services) សហការជាមួយក្រុមហ៊ុន New Theory Picture ចាក់បញ្ចាំងនៅតាមរោងភាពយន្តក្នុងប្រទេសកម្ពុជា ចាប់ពីថ្ងៃទី១៦ ខែតុលា ឆ្នាំ២០២៦ តទៅ នៅតាមបណ្តារោងភាពយន្តទូទាំងប្រទេសកម្ពុជា។

ខ្សែភាពយន្តឯកសារ រយៈពេល ៨៧នាទីនេះ បានបង្ហាញពីការពិតដ៏រន្ធត់នៃអតីតកាល ដែលបណ្ដាញឧក្រិដ្ឋជនបានកេងប្រវ័ញ្ច និងប្រើប្រាស់ទាហានកុមារដើម្បីវាយឆ្មក់ប្លន់យករតនសម្បត្តិបុរាណពីប្រាសាទនានាក្នុងប្រទេសកម្ពុជា។ «បុរាណវត្ថុប្រឡាក់ឈាម» ទាំងនោះ ត្រូវបានលួចរត់ពន្ធឆ្លងដែនទៅកាន់គេហដ្ឋានរបស់មហាសេដ្ឋី និងសារមន្ទីរល្បីៗនៅបស្ចិមប្រទេស ដែលពាក់ព័ន្ធនឹងបណ្ដាញរបស់ Douglas Latchford។

ភាពយន្តឯកសារដែលមានលក្ខណៈស៊ើបអង្កេតនេះ គឺជាស្នាដៃផលិតរបស់ក្រុមហ៊ុន New Theory Pictures និងដឹកនាំរឿងដោយលោក Don Millar ដោយមានកិច្ចសហការយ៉ាងជិតស្និទ្ធជាមួយក្រុមការងារបច្ចេកទេស និងផលិតករខ្មែរក្នុងស្រុក។ ភាពយន្តនេះបង្កប់នូវអត្ថន័យ និងតម្លៃជាប្រវត្តិសាស្ត្រដ៏ធំធេងសម្រាប់ជាតិកម្ពុជា ព្រោះវាបានលាតត្រដាងពីការពិតនៃការលួចប្លន់ និងការជួញដូរវត្ថុបុរាណខ្មែររាប់មិនអស់ទៅក្រៅប្រទេសដោយខុសច្បាប់ក្នុងអំឡុងពេលដែលកម្ពុជាធ្លាក់ចូលក្នុងភ្នក់ភ្លើងសង្គ្រាមស៊ីវិល និងរបបប្រល័យពូជសាសន៍។ ភាពយន្តនេះមិនត្រឹមតែជាការកត់ត្រាប្រវត្តិសាស្ត្រប៉ុណ្ណោះទេ ប៉ុន្តែថែមទាំងជាសក្ខីកម្មដ៏រឹងមាំមួយក្នុងការគាំទ្រដល់ដំណើរការទាមទារ និងនាំយកដួងព្រលឹងដូនតា និងសម្បត្តិបេតិកភណ្ឌជាតិត្រឡប់មកមាតុភូមិវិញ។ ភាពយន្តនេះក៏បានការទទួលស្គាល់ និងជ្រើសរើសចាក់បញ្ចាំងក្នុងមហោស្រពភាពយន្តអន្តរជាតិជាច្រើន ដូចជា NHK (Japan Prize, Finalist), Bali International Film Festival, Austin Film Festival, FIPADOC, Cambodia International Film Festival និងមហោស្រពភាពយន្តអន្តរជាតិល្បីៗជាច្រើនទៀត។

ដោយមើលឃើញពីសារៈសំខាន់របស់ខ្សែភាពយន្តឯកសារនេះ ក្រុមហ៊ុន AMS (Apsara Media Services) បានសម្រេចចិត្តជួបពិភាក្សា និងទាក់ទងផ្ទាល់ទៅកាន់ផលិតករដើម្បីបង្កើតកិច្ចសហការ នាំយកភាពយន្តនេះមកចាក់បញ្ចាំងជាផ្លូវការនៅតាមរោងភាពយន្តទំនើបៗ ក្នុងប្រទេសកម្ពុជា ក្នុងបំណងជំរុញទឹកចិត្តយុវជន និងសាធារណជនទូទៅ ឱ្យស្វែងយល់កាន់តែច្បាស់ពីប្រវត្តិសាស្ត្រ ព្រមទាំងរួមគ្នាបង្កើតចលនាមួយ ដើម្បីការពារ និងគាំទ្រដល់ការទាមទារសម្បត្តិបុរាណខ្មែរ ដែលត្រូវបានលួច នាំចេញទៅបរទេសឱ្យវិលត្រឡប់មកវិញ។

ភាពយន្តនេះនឹងធ្វើពិធីសម្ពោធផ្សព្វផ្សាយជាផ្លូវការនៅថ្ងៃពុធ ទី១៤ ខែតុលា ឆ្នាំ២០២៦ (វេលាម៉ោង ៥:០០ ល្ងាច ដល់ ៨:០០ យប់) នៅរោងភាពយន្ត Legend Premium Exchange Square ដោយមានការអញ្ជើញចូលរួមពីថ្នាក់ដឹកនាំជាន់ខ្ពស់រាជរដ្ឋាភិបាល តំណាងអង្គទូត សិល្បករ-តារាល្បីៗ និងអ្នកសារព័ត៌មានជាតិ-អន្តរជាតិ។
សម្រាប់សំបុត្រចូលទស្សនា នឹងមានលក់នៅគ្រប់រោងភាពយន្ត ពីថ្ងៃទី១៦ ខែតុលា ឆ្នាំ២០២៦ តទៅ នៅគ្រប់សាខានៃរោងភាពយន្ត។ ឆ្លៀតឱកាសនេះ ក្រុមហ៊ុន AMS ក៏សូមគូសបញ្ជាក់ផងដែរថា សម្រាប់ថវិកាដែលក្រុមហ៊ុនទទួលបានពីការចាក់បញ្ចាំងនេះនឹងយកទៅចូលរួមចំណែកក្នុងការផ្សព្វផ្សាយវប្បធម៌ និងសង្គម ជាពិសេស និងគាំទ្រដល់ការទាមទារយកសម្បត្តិបុរាណខ្មែរ ដែលត្រូវបានលួចនាំចេញទៅបរទេស ឱ្យវិលត្រឡប់មកមាតុប្រទេស វិញ។
ព័ត៌មានទំនាក់ទំនងសម្រាប់ប្រព័ន្ធផ្សព្វផ្សាយ (Media Contacts)
លោក អ៊ូច មករា
លេខទូរស័ព្ទ៖ ០១៧ ៦៦៥ ៦៧៥