ចំណេះដឹងកសិកម្ម ៖ ងាយៗបច្ចេកទេសផលិតស្កររងូ សម្រាប់ផលិតមេជី និងមេចំណីសត្វ

សម្រាប់ការកែច្នៃផលិតជីធម្មជាតិ ឬចំណីសត្វ កសិករមិនអាចមើលរំលងបាននោះទេនូវវត្ថុធាតុដើមដែលជាគ្រឿងផ្សំមួយប្រភេទដ៏មានសារៈសំខាន់ នោះគឺ ស្កររងូ ដែលមានប្រសិទ្ធភាពខ្ពស់ក្នុងការធ្វើប្រតិកម្មកែច្នៃចំពោះវិស័យកសិកម្ម ផលិតជីកំប៉ុសទឹក ជីគោក មេចំណីសត្វ ជាដើម។ ដូច្នេះ សូមងាកមកចាប់អារម្មណ៍ នឹងស្វែងយល់ពីបច្ចេកទេសក្នុងការផលិតស្កររងូ ដែលកសិករអាចអនុវត្តបានដោយខ្លួនឯង មានប្រសិទ្ធភាព និងជួយបង្កើនទិន្នផលកសិកម្មបានយ៉ាងប្រសើរ។

គ្រឿងផ្សំចម្បងដែលគេត្រូវការ គឺ ទឹកអំពៅ និងទឹកឃ្មុំ ប៉ុន្តែចៀសវាងប្រើទឹកអំពៅជូរផ្អូម ឬទឹកឃ្មុំមិនសុទ្ធ ដែលអាចប៉ះពាល់ដល់គុណភាពស្ករ។ ចំណែកបរិមាណ កសិករអាចគណនាតាមតម្រូវការស្ករដែលចង់បាន។ ក្នុងករណីធ្វើសម្រាប់ស្រោចដំណាំតិចតួច អាចសាកស្បងត្រឹមទឹកអំពៅ ៥លីត្រ ទឹកឃ្មុំ ៤ស្លាបព្រាបាយ អាចទទួលបានស្កររងូ ជាង ១គីឡូក្រាម។

ពាក់ព័ន្ធនឹងការផលិត គេត្រូវយកទឹកអំពៅសុទ្ធទៅចាក់ចូលក្នុងឆ្នាំងដែលដាក់កម្ដៅលើភ្លើង លាយជាមួយទឹកឃ្មុំ ដែលជួយឱ្យវាកាន់តែមានគុណភាព និងអាចរក្សាទុកបានយូរ។ បន្តកូរល្បាយទឹកអំពៅ ដោយបើកភ្លើងតិចៗ ចៀសវាងខ្លោចបាតឆ្នាំង ឬពុះហៀរពពុះចោល ហើយឧស្សាហ៍កូរវារហូតដល់រីងទឹក មានសភាពខាប់ជាស្ករ ឬមានពណ៌ជើងអង្ក្រង ប្រើរយៈពេលប្រមាណ ២ម៉ោង។

បន្ទាប់ពីកូរឱ្យវាដាច់ទឹកហើយ ត្រូវទុកវាឱ្យត្រជាក់ និងអាចច្រកដបសម្រាប់ប្រើប្រាស់បានហើយ។ ដោយឡែកស្ករដែលកូររួចរាល់ហើយមានសភាពខាបល្មម ពណ៌ជើងអង្ក្រង ឬទុកយូរអាចមានពណ៌កាន់តែក្រមៅ តែចៀសវាងទុកឱ្យខ្លោច។ ក្រៅពីនេះ កសិករក៏អាចប្រើស្ករត្នោតបានដែរ តែបើតាមបច្ចេកទេស គេណែនាំឱ្យប្រើទឹកអំពៅដែលមានប្រសិទ្ធភាពជាង។

បន្ទាប់ពីបានស្វែងយល់ពីបច្ចេកទេសដូចបានរៀបរាប់ខាងលើ កសិករអាចពិចារណាក្នុងការផលិតដោយខ្លួនឯង ឬអាចទិញស្រាប់ពីអ្នកលក់ផលិតផលកសិកម្មតែម្ដងក៏បាន ព្រោះការកែច្នៃដោយខ្លួនឯងអាចទទួលបានស្កររងូល្អ និងមានគុណភាព ប៉ុន្តែត្រូវចំណាយពេលវេលា និងថវិកាច្រើនទៅលើទឹកអំពៅស្រស់ ខណៈដែលស្កររងូដែលមានលក់នៅលើទីផ្សារ ភាគច្រើនគេយកចេញពីរោងចក្រ ដែលអាចមានតម្លៃប្រមាណ ៤ម៉ឺនរៀលក្នុងមួយកានប៉ុណ្ណោះ។

គួរបញ្ជាក់ដែរថា ស្កររងូ ឬកាកស្ករ គឺជាកាកសំណល់ដែលសល់ពីរោងចក្រស្ករស ហើយវាមានប្រយោជន៍ច្រើនក្នុងវិស័យកសិកម្ម ដែលគេអាចប្រើសម្រាប់ផលិតជី (ជីកំប៉ុសគោក ជីទឹក) ផលិតមេថ្នាំ ផលិតមេចំណី ក៏ដូចជាអាចផលិតអតិសុខុមប្រាណនានាផងដែរ៕