រុស្ស៊ី ប្រកាសដកខ្លួនចេញពីកិច្ចព្រមព្រៀងគ្រាប់ធញ្ញជាតិសមុទ្រខ្មៅ

បរទេស ៖ យោងទៅតាមប្រភពព័ត៌មានពី BBC បានរាយការណ៍ថា កិច្ចព្រមព្រៀងដែលអនុញ្ញាតឱ្យអ៊ុយក្រែននាំចេញគ្រាប់ធញ្ញជាតិតាមរយៈសមុទ្រខ្មៅបានផុតកំណត់ជាផ្លូវការហើយ បន្ទាប់ពីរុស្ស៊ីបានដកខ្លួនចេញពីកិច្ចព្រមព្រៀងដ៏សំខាន់មួយនេះ។

កាលពីថ្ងៃចន្ទកន្លងទៅនេះ ទីក្រុងមូស្គូបានជូនដំណឹងដល់អង្គការសហប្រជាជាតិ តួកគី និងអ៊ុយក្រែនថា ខ្លួននឹងមិនបន្តកិច្ចព្រមព្រៀងនេះទេ ហើយការសម្រេចចិត្តបានធ្វើឲ្យមេដឹកនាំពិភពលោកជាច្រើនមានការប្រតិកម្ម ដោយសារវាអាចប៉ះពាល់ដល់ប្រជាជនក្រីក្របំផុតមួយចំនួននៅលើសកលលោក។ យ៉ាងណាមិញ រុស្ស៊ី​បាន​និយាយ​ថា​ខ្លួន​នឹង​ត្រឡប់​ទៅ​កិច្ចព្រមព្រៀង​វិញ ដរាបណាកិច្ចព្រមព្រៀងនេះបំពេញតាមលក្ខខណ្ឌ​របស់​ខ្លួន​។

ជាយូរមកថា រុស្ស៊ីបានត្អូញត្អែរថា បទប្បញ្ញត្តិមួយចំនួននៃកិច្ចព្រមព្រៀងដែលអនុញ្ញាតឱ្យនាំចេញអាហារ និងជីរបស់រុស្ស៊ីមិនត្រូវបានឲ្យតម្លៃនោះទេ ជាពិសេសគ្រាប់ធញ្ញជាតិមិនត្រូវបានផ្គត់ផ្គង់ទៅដល់ប្រទេសក្រីក្រទេ ដែលជាលក្ខខណ្ឌមួយនៅក្នុងកិច្ចព្រមព្រៀង។ មិនត្រឹមតែប៉ុណ្ណោះ ប្រធានាធិបតីរុស្ស៊ី Vladimir Putin និយាយម្តងហើយម្តងទៀតថា រុស្ស៊ីនឹងដកខ្លួនចេញពីកិច្ចព្រមព្រៀងនេះ ដោយសារទណ្ឌកម្មរបស់លោកខាងលិចបានរឹតបន្តឹងការនាំចេញកសិផលរបស់ខ្លួន ។ ទោះជាយ៉ាងណាក្តី ប្រធានាធិបតីតួកគីលោក Recep Tayyip Erdogan នៅតែជឿជាក់ថា ប្រធានាធិបតីរុស្ស៊ី Vladimir Putin ចង់បន្តកិច្ចព្រមព្រៀងមួយនេះ ហើយពួកគេនឹងពិភាក្សាអំពីការបន្តកិច្ចព្រមព្រៀងនៅពេលពួកគេជួបគ្នានៅខែក្រោយ។

គួរឲ្យបញ្ជាក់ដែរថា កិច្ចព្រមព្រៀង​គ្រាប់ធញ្ញជាតិនេះ​មាន​សារៈសំខាន់ ដោយសារ​អ៊ុយក្រែន​ជា​ប្រទេស​នាំចេញ​ផ្កាឈូករ័ត្ន ពោត ស្រូវសាលី និង គ្រាប់ barley ​ធំជាងគេ​មួយ​របស់​ពិភពលោក។ បន្ទាប់ពីមានសង្គ្រាមជាមួយនឹងរុស្ស៊ីកាលពីឆ្នាំមុនកន្លងទៅនេះ នាវាកងទ័ពជើងទឹកបានបិទច្រករបស់អ៊ុយក្រែន ដែលធ្វើឲ្យជាប់គាំងគ្រាប់ធញ្ញជាតិ ២០ លានតោន។ លើសពីនេះ ការ​បិទច្រកនេះ​បានបង្កឲ្យ​​តម្លៃ​ម្ហូប​អាហារ​ពិភពលោក​ឡើង​ថ្លៃ ព្រមទាំងបានគំរាមកំហែងការផ្គត់ផ្គង់ស្បៀងអាហារដល់បណ្តាប្រទេសមជ្ឈិមបូព៌ា និងអាហ្វ្រិកមួយចំនួន ដែលពឹងផ្អែកខ្លាំងលើគ្រាប់ធញ្ញជាតិអ៊ុយក្រែនផងដែរ។

ប្រធានាធិបតីអ៊ុយក្រែន លោក Volodymyr Zelensky បាននិយាយថា អ៊ុយក្រែនមានបំណងបន្តការនាំចេញគ្រាប់ធញ្ញជាតិ ហើយខ្លួនមិនខ្លាចនោះទេ​ចំពោះការ​សម្រេច​ចិត្ត​របស់​រុស្ស៊ី​ក្នុង​ការ​ដក​ខ្លួន​ចេញ​ពី​កិច្ច​ព្រម​ព្រៀង​នេះ​។ ទន្ទឹមនឹងនេះ អ៊ុយក្រែនត្រូវបានទាក់ទងដោយក្រុមហ៊ុន​ដែលជាម្ចាស់នាវា ដោយពួកគេសុខចិត្តបន្តដឹកជញ្ជូនគ្រាប់ធញ្ញជាតិ ប្រសិនបើអ៊ុយក្រែនយល់ព្រមអនុញ្ញាតឱ្យពួកគេចូល និង ការអនុញ្ញាតពីតួកគីដើម្បីឆ្លងកាត់។

លោក Mykhaylo Podolyak ទីប្រឹក្សារបស់លោក Zelensky បានផ្តល់យោបល់ថា កម្លាំងល្បាតប្រដាប់អាវុធអន្តរជាតិគួរត្រូវបានបង្កើតឡើង ដើម្បីអមដំណើរនាវាដឹកគ្រាប់ធញ្ញជាតិពីអ៊ុយក្រែន និងធានាសុវត្ថិភាពរបស់ពួកគេ។ ទោះជាយ៉ាងណាក៏ដោយ ប្រហែលជាមិនមានប្រទេសជាច្រើនមានបំណងបង្កើតការល្បាតបែបនេះទេ ហើយច្រក​ទាំង​នោះ​នឹង​មាន​ប្រសិទ្ធភាព​តិច ដែលអាចនាំឲ្យអ៊ុយក្រែនកាត់​បន្ថយការនាំចេញ​បរិមាណ​គ្រាប់​ធញ្ញជាតិ និងបង្កើនតម្លៃ​។

ទន្ទឹមនឹងនេះដែរ មេដឹកនាំពិភពលោកបានសំដែងការមិនពេញចិត្តចំពោះការសម្រេចចិត្តនេះ ដោយប្រធានគណៈកម្មការសហភាពអឺរ៉ុប Ursula von der Leyen និង ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield បានចោទប្រកាន់រុស្ស៊ីថា នេះជាទង្វើដ៏ឃោរឃៅ។

លោក Ngozi Okonjo-Iweala ដែលជាប្រធានអង្គការពាណិជ្ជកម្មពិភពលោក (WTO) បាននិយាយថា ពាណិជ្ជកម្មតាមសមុទ្រខ្មៅលើអាហារ ចំណី និងជីគឺមានសារៈសំខាន់ចំពោះស្ថិរភាពនៃតម្លៃអាហារពិភពលោក ហើយលោកសង្ឃឹមថា ទីក្រុងម៉ូស្គូនឹងពិចារណាឡើងវិញពីការដកខ្លួនចេញពីកិច្ច​ព្រម​ព្រៀង។ អគ្គលេខាធិការអង្គការសហប្រជាជាតិ លោក Antonio Guterres បាននិយាយថា  UN នឹងស្វែងរកដំណោះស្រាយចំពោះបញ្ហានេះ ដោយសារវាអាចធ្វើឲ្យមនុស្សរាប់លាននាក់ត្រូវរងគ្រោះ៕