តំបន់​ជុំវិញ​ព្រលានយន្តហោះអន្តរជាតិ​តេជោ នឹង​កាន់តែមានសក្ដានុពល​ ខណៈគម្រោង​ជា​ច្រើន​កំពុងលេច​រូប​រាង​​

ភ្នំពេញ ៖ ​ស្រ​បទៅនឹងគម្រោង​អាកាសយានដ្ឋានអន្តរជាតិ​តេជោ​ក្រុងតាខ្មៅកាន់តែ​ជិត​បើក​ដំណើរការ អ្នកជំនាញនៅក្នុងវិស័យអចលនទ្រព្យកម្ពុជា ជាពិសេសផ្នែកដីធ្លីបានលើកឡើងថា តំបន់ដែលនៅជុំវិញ​គម្រោងអាកាស​យានដ្ឋា​ន​​មួយនេះ​ប្រមាណ១០​គីឡូម៉ែត្រ​នឹងកាន់តែមានសក្ដានុពល និងតម្រូវការទីផ្សារ ហើយតម្លៃក៏កាន់តែឡើងថ្លៃជាងពេលបច្ចុប្បន្ន ខណៈដែលអ្នករកស៊ីនៅក្នុងវិស័យនេះក៏កំពុងដើរសម្លឹងមើលដើម្បីទិញទុកវិនិយោគយកចំណេញ។

​បើតាម​លោក ប៉ូ អ៊ាវគង់ អគ្គ​នាយ​កក្រុមហ៊ុន​​ Advance Real Estate បានមានប្រសាសន៍ថា ទន្ទឹម​នឹង​ព្រលានយន្តហោះនេះ​ដំណើរការ​ ការ​វិនិយោគនៅតំបន់​ជុំវិញ​ព្រលានយន្តហោះ​ ជា​ពិ​សេ​ស​ចម្ងាយ​១០គីឡូម៉ែត្រ​ជុំវិញព្រលានយន្តហោះ នឹង​កាន់តែទាក់ទាញ ដោយ​នឹង​មានវិនិយោគថ្មីៗ​បន្ថែម​ទៀត​ ​ដូចជា​ ការសាងសង់ជាឃ្លាំង ​គម្រោងក្នុងវិស័យឧស្សាហកម្ម​ លំនៅឋាន ​និងមណ្ឌលអាជីវកម្ម​ជា​ដើម ។

លោក​បានបញ្ជាក់ទៀតថា ៖

«បច្ចុប្បន្ន​នេះ យើងឃើញ​មានការអភិវឌ្ឍ​លើ​ហេដ្ឋារចនាសម្ព័ន្ធ​ជុំវិញព្រលានយន្តហោះជិតរួចរាល់ទាំងស្រុងហើយ​ ហើយក៏កំពុងតែទាក់ទាញចិត្តអ្នកវិនិយោគផងដែរ ដូចជា​តំបន់​ផ្លូវ​៦០ម៉ែត្រ តំបន់​តាមបណ្ដោយផ្លូវជាតិលេខ​២​ ផ្លូវ​ក្រវា​ត់​ក្រុ​ង​​ទី​​៣ និង​ផ្លូវជាតិលេខ​២១​​ជាដើម ។ តម្លៃដីនៅតាមតំបន់ទាំង​នេះ ក៏ឃើញថា​ល្អ​ប្រសើរ​សម្រាប់​ការ​វិនិយោគ ដូច្នេះ​ហើយ​វិនិយោគិន​នឹង​ចាប់អារម្មណ៍ច្រើន ជាក់ស្ដែង​តាមបណ្ដោយផ្លូវជាតិលេខ​២ បើ​ប្រៀ​បធៀ​​​ប​​​នឹង​ផ្លូវជាតិលេខ​៣ ឃើញថា​ នៅមា​ន​តម្លៃ​ទា​ប​ជាង​ ខណៈតំបន់ទាំង​ពីរ​នេះ គឺមានសក្ដានុពល​សម្រាប់ឧស្សាហកម្ម​រោងចក្រ​សហគ្រាស​ដូចគ្នា​»។

លោកបន្ថែមទៀតថា ​នៅពេលឆាប់ៗខាងមុខនេះ​ គម្រោងព្រែកជីក​ហ្វូណ​ន​តេជោ​​​នឹង​កា​ត់​តា​ម​​តំបន់​ជុំវិញ​ព្រលានយន្តហោះ​អន្តរជាតិ​តេជោដែរ ដូច្នេះ​វា​នឹង​កាន់តែទាក់ទាញវិនិយោគ ហើយនឹ​ង​ធ្វើឱ្យតំបន់​ក្បែរ​​នោះកាន់តែមានសក្ដានុពល ។​

អ្នកឧកញ៉ា​ សៀ ឬទ្ធី​ ប្រធានក្រុមប្រឹក្សាភិបាល​ក្រុមហ៊ុន​ Worldbridge Group ក៏បានលើកឡើងថា រយៈពេល ​២ ទៅ ៣ឆ្នាំខាងមុខនេះ តម្រូវការ​ឃ្លាំង និង​រោងចក្រ​ នៅក្នុង​ប្រទេស​កម្ពុជា​នឹង​កើនឡើង​ខ្ពស់ ដូច្នេះ ​វិនិយោ​គិន​​លើវិស័យអចលនទ្រព្យគួ​រសម្លឹង​មើលការ​វិនិយោគ​លើ​រោងចក្រ​ និងឃ្លាំង ។ អ្វីដែលពិសេស​គួរ​ជ្រើស​រើស​​តំបន់ណាមួយ​ដែលមានសក្ដានុពល​សម្រាប់វិស័យមួយនេះ ។

គួរ​បញ្ជាក់ថា​ បច្ចុប្បន្ននេះ វឌ្ឍនភាពនៃគម្រោងព្រលានយន្តហោះអន្តរជាតិ​តេជោ សម្រេច​ប្រមាណ ៩៤ភាគរយ​ហើយ គិតត្រឹមចុង​ខែកុម្ភៈ ឆ្នាំ២០២៥​នេះ ខណៈក្នុងផែនការ​ អាកាសយានដ្ឋានអន្តរជាតិដ៏ធំមួយនេះ នឹង​ចាប់ផ្ដើម​ដំណើរការ​នៅអំឡុង​ខែ​កក្កដា ២០២៥ ។ ទន្ទឹមនឹង​ការ​ដាក់ដំណើរការ​អាកាស​យានដ្ឋានអន្តរជាតិ​តេជោ​នេះ បើតាម​មន្ត្រីជាន់ខ្ពស់នៃ​រដ្ឋលេខាធិការដ្ឋាន​អាកាសចរ​ណ៍​ស៊ីវិល បានបញ្ជាក់ថា ​អាកាសយានដ្ឋានអន្តរជាតិ​-ភ្នំពេញ នឹង​ត្រូវ​បិទលែង​ដំណើរការ ៕