កំណើនសេដ្ឋកិច្ចអាមេរិកកើនឡើងដល់ ២,៤ ភាគរយលើសការរំពឹងទុក

បរទេស៖ យោងទៅតាមប្រភពព័ត៌មានពី Politico បានរាយការណ៍ថា កំណើនសេដ្ឋកិច្ចអាមេរិកកើនឡើងលឿនដោយនឹកស្មានមិនដល់ ២,៤ ភាគរយនៅក្នុងត្រីមាសទី២ក្នុងឆ្នាំនេះ។ ការកើនឡើងកំណើនសេដ្ឋកិច្ចរបស់អាមេរិកបានបង្ហាញពីភាពធន់ទៅនឹងអត្រាការប្រាក់ខ្ពស់ ដើម្បីទប់ទល់ទៅនឹងអតិផរណាក្នុងរយៈពេល ១៦ ខែកន្លងមកនេះ។

ការកើនឡើងនៃការចំណាយដែលបណ្តាលឱ្យមានប្រាក់កម្ចីជាច្រើនប្រភេទ រួមទាំងប័ណ្ណឥណទាន ប្រាក់កម្ចីរថយន្ត និងការខ្ចីប្រាក់អាជីវកម្មបានជះឥទ្ធិពលអវិជ្ជមានដល់កំណើនសេដ្ឋកិច្ច។ ទោះបីជាយ៉ាងណាក្តី បញ្ហានេះមិនបង្កឲ្យសហរដ្ឋអាមេរិកធ្លាក់ចូលទៅក្នុងវិបត្តិសេដ្ឋកិច្ចធ្ងន់ធ្ងរនោះទេ។ ទន្ទឹមនឹងនេះដែរ ទីផ្សារការងាររបស់អាមេរិកមានភាពរឹងមាំគួរឱ្យកត់សម្គាល់ ដោយអត្រាគ្មានការងារធ្វើធ្លាក់មកនៅត្រឹម ៣,៦ ភាគរយកាលពីខែមិថុនាកន្លងទៅនេះ។

ចាប់តាំងពីមានការរាតត្បាតកូវីដ-១៩ មក កំណើននៃការចូលនិវត្តន៍បានកើនឡើង និង រួមចំណែកដល់ការខ្វះខាតបុគ្គលិកនៅទូទាំងប្រទេស ដោយបង្ខំឱ្យក្រុមហ៊ុនជាច្រើនដំឡើងប្រាក់ឈ្នួលដើម្បីទាក់ទាញ ឬរក្សាបុគ្គលិក។ ដូច្នោះហើយ ការដំឡើប្រាក់បៀវត្សរ៍ខ្ពស់ និងសុវត្ថិភាពការងារកំពុងផ្តល់ឱ្យជនជាតិអាមេរិកនូវទំនុកចិត្តសម្រាប់ហិរញ្ញវត្ថុរបស់ពួកគេ ដែលអាចជួយរក្សាអត្រាការទិញទំនិញ។

លើសពីនេះ ការចំណាយរបស់ពលរដ្ឋជំរុញសកម្មភាពសេដ្ឋកិច្ចប្រហែល ៧០ ភាគរយ និង បានកើនឡើងក្នុងអត្រាប្រចាំឆ្នាំ ៤,២ ភាគរយនៅក្នុងត្រីមាសទីមួយ ដែលជាល្បឿនប្រចាំត្រីមាសលឿនបំផុតក្នុងរយៈពេលជិត ២ ឆ្នាំមកនេះ។ មិនត្រឹមតែប៉ុណ្ណោះ ពលរដ្ឋអាមេរិកបានបន្តការចំណាយលើការលម្ហែឈប់សម្រាក់ដូចជា ការជិះយន្តហោះដែលកកកុញ ធ្វើដំណើរទៅក្រៅប្រទេស ការចូលរួមមើលការប្រគំតន្ត្រី និងរោងកុនជាដើម។ កាលពីថ្ងៃអង្គារកន្លងទៅនេះ ក្រុមស្រាវជ្រាវផ្នែកអាជីវកម្មបានរាយការណ៍ថា ជីវភាពរស់នៅរបស់ពលរដ្ឋអាមេរិកក្នុងខែនេះមានស្ថានភាពល្អប្រសើរជាងមុន ដោយសារចំនួនអ្នកប្រើប្រាស់ជាច្រើនកំពុងរីករាយនឹងការបន្ធូរបន្ថយពីការឡើង។

នៅសប្តាហ៍នេះ មូលនិធិរូបិយវត្ថុអន្តរជាតិ (IMF) បានដំឡើងការព្យាករណ៍របស់ខ្លួនសម្រាប់កំណើនសេដ្ឋកិច្ចរបស់សហរដ្ឋអាមេរិកពី ១,៦ ភាគរយឡើងដល់ ១,៨ ភាគរយ។ បន្ទាប់ពីធនាគារកណ្តាល Fed បានប្រកាសពីការដំឡើងអត្រាការប្រាក់ប្រចាំត្រីមាសចុងក្រោយរបស់ខ្លួន ប្រធានធនាគារ Jerome Powell បានបង្ហាញថាពួកគេលែងមើលឃើញពីវិបត្តិសេដ្ឋកិច្ចនៅក្នុងសហរដ្ឋអាមេរិកទៀតហើយ។ លោក Powell ក៏បានកត់សម្គាល់ថាសេដ្ឋកិច្ចបានបង្ហាញពីភាពធន់ បើទោះបីជាអត្រាការប្រាក់កើនឡើងយ៉ាងឆាប់រហ័សក៏ដោយ ប៉ុន្តែវាក៏អាចធ្លាក់ចុះវិញផងដែរ។ ទោះជាយ៉ាងណាក៏ដោយ ការដំឡើងអត្រាការប្រាក់ខ្ពស់នឹងបន្ថយការខ្ចីប្រាក់សម្រាប់ការទិញផ្ទះ ឡាន ការជួសជុល ការពង្រីកអាជីវកម្ម និងការចំណាយថ្លៃដើមផ្សេងទៀត។ លើសពីនេះ ទីផ្សារលំនៅដ្ឋានគឺជាចំណុចខ្សោយមួយរបស់សេដ្ឋកិច្ច ដោយការលក់ផ្ទះបានធ្លាក់ចុះខ្លាំងដល់ ២៣ ភាគរយនៅឆមាសទីមួយនៃឆ្នាំនេះ៕