កម្ពុជា ថៃ និងម៉ាឡេស៊ី ជាប្រទេសនាំមុខគេក្នុងការប្រើប្រាស់ប្រព័ន្ធទូទាត់តាម QR Code នៅក្នុងតំបន់

ភ្នំពេញ ៖ ការទូទាត់តាមប្រព័ន្ធ QR Code កំពុងរីកចម្រើនយ៉ាងឆាប់រហ័សនៅក្នុងតំបន់អាស៊ីអាគ្នេយ៍ ជាពិសេសនៅកម្ពុជា ថៃ និងម៉ាឡេស៊ី ដែលជាប្រទេសនាំមុខគេក្នុងតំបន់។ កំណើននេះដោយសារតែកត្តាមួយចំនួន ដូចជាម៉ាស៊ីន ATM មានចំនួនតិចនៅតាមទីតំបន់ជនបទ ទូរសព្ទឆ្លាតវៃមានតម្លៃសមរម្យ ការកើនឡើងនៃវិស័យទេសចរណ៍ និងប្រព័ន្ធទូទាត់ឆ្លងប្រទេសក៏ដើរតួយ៉ាងសំខាន់ក្នុងនិន្នាការនេះផងដែរ។

នៅក្នុងប្រទេសកម្ពុជា ការទូទាត់តាម QR បានកើនឡើង ២៩% ក្នុងឆ្នាំ២០២៣ ជាមួយនឹងប្រតិបត្តិការចំនួន ៦០១ លានប្រតិបត្តិការ។ បច្ចុប្បន្ន ធនាគារជាតិនៃកម្ពុជា បានដាក់ប្រព័ន្ធទូទាត់ Bakong Tourists ដែលជាប្រព័ន្ធទូទាត់តាមទូរស័ព្ទ សម្រាប់អ្នកដំណើរ និងទេសចរ។ ប្រព័ន្ធនេះប្រើប្រាស់ QR Code ដែលទូទាត់ជាប្រាក់រៀល និងអាចទូទាត់បានជាមួយទីតាំងអាជីវកម្មរាប់លាននាក់ រួមទាំងអ្នកលក់តូចៗផងដែរ។

ប្រទេសម៉ាឡេស៊ីក៏មានការរីកចម្រើនយ៉ាងឆាប់រហ័សនៃការទូទាត់តាមប្រព័ន្ធ QR ជាមួយនឹងប្រព័ន្ធ DuitNow QR ដែលត្រូវបានដាក់ឱ្យដំណើរការក្នុងឆ្នាំ ២០១៩។ ប្រព័ន្ធនេះត្រូវបានប្រើនៅទូទាំងប្រទេសអាស៊ាន ដែលអនុញ្ញាតឱ្យប្រជាជនធ្វើការទូទាត់នៅក្នុងប្រទេសផ្សេងទៀតដោយប្រើប្រព័ន្ធ QR ផ្សេងៗគ្នា។ នៅក្នុងឆមាសទីមួយនៃឆ្នាំ ២០២៣ DuitNow QR មានប្រតិបត្តិការជាង ១.៥ ពាន់លានប្រតិបត្តិការ។

ប្រព័ន្ធទូទាត់ PromptPay របស់ប្រទេសថៃបានក្លាយជាការពេញនិយមយ៉ាងទូលំទូលាយ ដោយមានអ្នកប្រើប្រាស់ចុះឈ្មោះជាង ៧៧ លាននាក់ក្នុងឆ្នាំ ២០២៣ ។ PromptPay អនុញ្ញាតឱ្យការទូទាត់ឆ្លងប្រទេសក្នុងតំបន់អាស៊ាន និងមានប្រយោជន៍ជាពិសេសសម្រាប់ភ្ញៀវទេសចរ និងពលករចំណាកស្រុក។ ប្រតិបត្តិការ QR នៅក្នុងប្រទេសថៃបានកើនឡើងទ្វេដងពី ២.៥ ពាន់លានក្នុងឆ្នាំ ២០២២ ដល់ ៥.៧ ពាន់លានប្រតិបត្តិការនៅឆ្នាំ ២០២៣។

ឥណ្ឌូណេស៊ី និងវៀតណាម ក៏មានការកើនឡើងយ៉ាងច្រើននៅក្នុងការទូទាត់តាមប្រព័ន្ធ QR ផងដែរ។ នៅក្នុងប្រទេសឥណ្ឌូនេស៊ី ប្រតិបត្តិការតាមប្រព័ន្ធ QRIS បានកើនឡើង ២២៦% នៅចុងឆ្នាំ ២០២៣ ហើយការទូទាត់តាម QR របស់វៀតណាមបានកើនឡើងជាង ១០៤% នៅក្នុងឆមាសទីមួយនៃឆ្នាំ ២០២៤។

ប្រទេសផ្សេងទៀត ដូចជាហ្វីលីពីន កំពុងទទួលយកការទូទាត់តាមប្រព័ន្ធ QR ដោយប្រតិបត្តិការកើនឡើងយ៉ាងខ្លាំងផងដែរ។ កំណើននៃការទូទាត់តាម QR នៅក្នុងតំបន់អាស៊ីអាគ្នេយ៍នៅតែបន្តកើនឡើង ជាពិសេសជាមួយនឹងមនុស្សកាន់តែច្រើនដែលប្រើប្រាស់វិធីសាស្រ្តទូទាត់ដោយមិនមានសាច់ប្រាក់ក្នុងដៃ សម្រាប់ប្រតិបត្តិការប្រចាំថ្ងៃរបស់ពួកគេ។

សម្រាប់ប្រទេសកម្ពុជា លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា មានប្រសាសន៍កាលពីថ្មីៗនេះថា ស្របតាមយុទ្ធសាស្ត្របញ្ចកោណដំណាក់កាលទី១ ដែលបានចាត់ទុកបច្ចេកវិទ្យាជាអាទិភាពគន្លឹះមួយក្នុងចំណោមអាទិភាពគន្លឹះទាំងប្រាំ ធនាគារជាតិនៃកម្ពុជាបានអភិវឌ្ឍប្រព័ន្ធទូទាត់ ដើម្បីធ្វើឱ្យការទូទាត់កាន់តែងាយស្រួល សុវត្ថិភាព និងឆាប់រហ័ស មិនថា ការទូទាត់ឆ្លងគ្រឹះស្ថានក្នុងស្រុក និងការទូទាត់ឆ្លងដែននោះទេ សំដៅគាំទ្រការអភិវឌ្ឍសេដ្ឋកិច្ច និងសង្គមឌីជីថល។

លោកជំទាវបណ្ឌិត បានថ្លែងបន្តថា ក្នុងចំណោមប្រព័ន្ធទូទាត់ទាំងអស់ ប្រព័ន្ធទូទាត់បាគងបាននិងកំពុងបំពេញមុខងារកាន់តែសម្បូរបែបជូនដល់អ្នកប្រើប្រាស់ ដែលបានជំរុញការប្រើប្រាស់ប្រព័ន្ធនេះ ឱ្យកើនឡើងជាបន្តបន្ទាប់ និងរួមចំណែកដល់ការលើកកម្ពស់បរិយាបន្នហិរញ្ញវត្ថុ និងមុខមាត់កម្ពុជានៅលើឆាកអន្តរជាតិ។

លោកជំទាវបណ្ឌិត បានឱ្យដឹងទៀតថា បន្ថែមលើនេះ ធនាគារជាតិនៃកម្ពុជាបានដាក់ឱ្យដំណើរការគម្រោងទូទាត់ឆ្លងដែនជាមួយប្រទេសថៃ ឡាវ វៀតណាម និងក្រុមហ៊ុនអន្តរជាតិយូញៀនផេ ព្រមទាំងកំពុងពង្រីកគម្រោងទូទាត់ឆ្លងដែនជាមួយប្រទេសផ្សេងទៀតក្នុងតំបន់និងដៃគូសហការនានា ដូចជា ប្រទេសចិន ជប៉ុន ឥណ្ឌា កូរ៉េ សិង្ហបុរី ម៉ាឡេស៊ី និងក្រុមហ៊ុនអាលីផេជាដើម។

សូមបញ្ជាក់ផងដែរថា ក្នុងឆមាសទី១ ឆ្នាំ២០២៤ ចំនួនប្រតិបត្តិការជាប្រាក់រៀលតាមប្រព័ន្ធបាគងមាន ៧៥,៥ លានប្រតិបត្តិការ កើនឡើង ១,៨ ដង ធៀបនឹងគ្រាដូចគ្នាឆ្នាំមុន ខណៈដែលទំហំប្រតិបត្តិការជាទឹកប្រាក់មានចំនួន ៦៤,៩ ទ្រីលានរៀល កើនឡើង ១,៤ ដង ហើយចំនួន និងទំហំប្រតិបត្តិការជាប្រាក់ដុល្លារអាមេរិកមាន ៩៩,៨ លានប្រតិបត្តិការ កើនឡើង ១,៣ ដង និង ៣៨,៨ ប៊ីលានដុល្លារអាមេរិក កើនឡើង ១,៣ ដង រៀងគ្នា។ នេះបើយោងតាមរបាយការណ៍របស់ធនាគារជាតិនៃកម្ពុជា៕