ចិនថា ខ្លួនមិនញញើតក្នុងការប្រយុទ្ធសង្គ្រាមពាណិជ្ជកម្មជាមួយអាម៉េរិកនោះឡើយ

បរទេស៖ យោងតាមប្រភពព័ត៌មានពី CNA បានរាយការណ៍ថា ចិនមិនភ័យខ្លាច ឬញញើតក្នុងការប្រយុទ្ធសង្រ្គាមពាណិជ្ជកម្មជាមួយសហរដ្ឋអាម៉េរិកនោះទេ និងអំពាវនាវឱ្យមានការចរចាត្រឹមត្រូវមួយ ដើម្បីស្វែងរកភាពល្អប្រសើរទាំងសងខាង។

កាលពីថ្ងៃអង្គារ ប្រធានាធិបតីអាម៉េរិក Donald Trump បានលើកឡើថា វាអាស្រ័យលើប្រទេសចិនក្នុងការឡើងមកតុចរចា ហើយប្រទេសចិនត្រូវតែធ្វើកិច្ចព្រមព្រៀងជាមួយអាមេរិក។ កាលពីដំបូង Trump បានដាក់ពន្ធលើការនាំចូលពីប្រទេសចិនពាក់ព័ន្ធនឹងករណីចោទប្រកាន់ថា ចិនបាននាំចេញសារធាតុ fentanyl មកកាន់អាម៉េរិក។ ថ្មីៗនេះ Trump បានបង្កើនការយកពន្ធពីរដ្ឋបាលមុនយ៉ាងខ្លាំងក្លារហូតដល់ទៅ ១៤៥% លើទំនិញជាច្រើនមកពីប្រទេសចិន។ យ៉ាងណាមិញ រដ្ឋបាល Trump បានបន្ធូរបន្ថយការយកពន្ធជាបណ្តោះអាសន្នលើផលិតផលបច្ចេកវិទ្យាមួយចំនួនដូចជា៖ ស្មាតហ្វូន និងកុំព្យូទ័រយួរដៃ laptop ជាដើម។

ដោយឡែក កាលពីថ្ងៃពុធកន្លងទៅនេះ ទីក្រុងប៉េកាំងបានឆ្លើយតបទៅវិញថា សហរដ្ឋអាមេរិកគឺជាអ្នកផ្តួចផ្តើមសង្គ្រាមពន្ធគយនេះ។ អ្នកនាំពាក្យក្រសួងការបរទេសចិន លោក Lin Jian លើកឡើងថា ប្រសិនបើសហរដ្ឋអាម៉េរិកពិតជាចង់ដោះស្រាយបញ្ហាតាមរយៈការសន្ទនា និងការចរចាពិតមែន អាម៉េរិកគួរតែបញ្ឈប់ការដាក់សម្ពាធខ្លាំងក្លា,បញ្ឈប់ការគំរាមកំហែង, និងការបង្ខូចកេរ្តិ៍ឈ្មោះចិន ហើយគួរនិយាយជាមួយចិនប្រកបដោយសមភាព និងការគោរពគ្នាទៅវិញទៅមក។ ចិននៅតែប្រកាន់គោលជំហរច្បាស់លាស់របស់ខ្លួនថា គ្មានអ្នកឈ្នះនៅក្នុងសង្គ្រាមពន្ធគយ ឬសង្រ្គាមពាណិជ្ជកម្មនោះទេ។ ចិន​មិន​ចង់​ប្រយុទ្ធ​នោះទេ ប៉ុន្តែក៏​មិន​ខ្លាច​ក្នុង​ការប្រយុទ្ធនោះដែរ​៕