អ្នកឧកញ៉ា សួរ វីរៈ ៖ កិច្ចសហប្រតិបត្តិការអន្តរជាតិ មានសារៈសំខាន់ខ្លាំងក្នុងការទប់ស្កាត់អំពើប្រល័យពូជសាសន៍គ្រប់ទម្រង់ដែលបង្កគ្រោះមហន្តរាយដល់មនុស្សជាតិ

ភ្នំពេញ៖ អ្នកឧកញ៉ា សួរ វីរៈ  អគ្គនាយកក្រុមហ៊ុន វិរៈ ប៊ុនថាំ អេចប្រេស និងជាកុងស៊ុលកិត្តិយស​អ៊ីស្រាអែល ​ប្រចាំ​ព្រះរាជាណាចក្រ​កម្ពុជា និងជាកុមារមួយរូបដែលបានហែលឆ្លងរបបប្រល័យពូជសាសន៍ប៉ុលពត​ បានបង្ហាញពី​ការចូលរួម​គាំទ្រដល់ទិវាចងចាំដល់ជនរងគ្រោះនៃព្រឹត្តិការណ៍ហូឡូខូស (Holocaust) ។

នៅថ្ងៃទី២៧ខែមករា ជាជារៀងរាល់ឆ្នាំសហគមន៍អន្តរជាតិនានានៅលើកពិភពលោក​តែងប្រារព្ធទិវាចងចាំដល់ជនរងគ្រោះនៃព្រឹត្តិការណ៍ហូឡូខូស។កាលបរិច្ឆេទនេះត្រូវបានកំណត់ដោយអង្គការសហប្រជាជាតិនៅឆ្នាំ២០០៥ដើម្បីរំលឹកដល់ការរំដោះតំបន់អូស្វីត-បៀកណូដែលជាជំរំសម្លាប់រង្គាលដ៏ធំនិងល្បីល្បាញ​បំផុតក្នុងប្រវត្តិសាស្ត្រនិងដើម្បីឆ្លុះបញ្ចាំងជា សកល ពីគ្រោះថ្នាក់ នៃការស្អប់ខ្ពើមរើស​អើងជាតិសាសន៍ ការបន្ទាបតម្លៃមនុស្ស និងបិទ​សិទ្ធិ​សេរីភាព។ ទិវានេះមិនត្រឹមតែមានគោលបំណងចងចាំអតីតកាលប៉ុណ្ណោះទេ ប៉ុន្តែថែមទាំងជាការរំលឹកអប់រំ ព្រមាននិងទប់ស្កាត់អំពើឃោរឃៅ នាពេលអនាគត​ផងដែរ។

អ្នកឧកញ៉ា បាន​គូសបញ្ជាក់​ពី​សារៈសំខាន់​នៃ​កិច្ច​សហប្រតិបត្តិការ​អន្តរជាតិ​ក្នុង​ការ​ជំរុញ​ការ​ចងចាំដល់ជនរងគ្រោះគ្រប់រូបនៃអំពើប្រល័យពូជសាសន៍គ្រប់ទម្រង់ ដែលជាគ្រោះមហន្តរាយមនុស្សជាតិសកលដែលអាចកើតឡើងគ្រប់ទីកន្លែងលើសកលលោក។

កិច្ច​គាំទ្រ​របស់អ្នកឧកញ៉ា សួរ វីរៈ គឺជាការឆ្លុះបញ្ចាំង​ពី​ការ​ប្តេជ្ញា​ចិត្ត​រួម​ លើកកម្ពស់​តម្លៃ​​​សន្តិភាព សេចក្តីថ្លៃថ្នូរ និង​កិច្ចគាំពារ​សិទ្ធិមនុស្សជាតិជាសកល។

អ្នកឧកញ៉ា សួរ វីរៈ បានសង្កត់ធ្ងន់ថា ទិវាចងចាំដល់ជនរងគ្រោះនៃព្រឹត្តិការណ៍​​ហូឡូខូស បាន​ឆ្លុះ​បញ្ចាំង​ជា​ថ្មី​អំពី​ការទទួលខុសត្រូវ​របស់​ប្រជាជាតិ និង​ប្រជាជន​ទាំងអស់​ក្នុង​ការ​រួបរួម​ប្រឆាំង​នឹង​ការ​ប្រល័យ​ពូជសាសន៍ ការ​ស្អប់ខ្ពើម និង​ការ​រើសអើង​គ្រប់​ទម្រង់​ទាំងអស់ និង​ដើម្បី​ធានា​បានថា​របបដ៏ព្រៃផ្សៃទាំងនោះ នឹងមិនត្រឡប់មកសារជាថ្មីនាពេល​អនាគត។

គួរជម្រាបថា៖ហូឡូខូស គឺជាព្រឹត្តិការណ៍នៃការសម្លាប់រង្គាលដែលបានរៀបចំឡើងលើជនជាតិជ្វីហ្វចំនួន ប្រាំមួយលាននាក់ដោយពួកណាស៊ីអាល្លឺម៉ង់ និងបក្សពួកពីឆ្នាំ ១៩៣៣ ដល់ឆ្នាំ ១៩៤៥។ ជនជាតិជ្វីហ្វត្រូវបានគេធ្វើទុក្ខបុកម្នេញ និរទេស និងសម្លាប់ដោយសារតែស្អប់ខ្ពើមការរើសអើងជាតិសាសន៍។ គោលដៅចំបងរបស់ពួកគេ គឺការបំផ្លិចបំផ្លាញប្រជាជន វប្បធម៌ និងអនាគតរបស់ជ្វីហ្វទាំងស្រុង ដែលនេះជាឧក្រិដ្ឋកម្មដ៏ធ្ងន់ធ្ងរមួយដែលអាចសម្គាល់យ៉ាងច្បាស់ថា ជាអំពើប្រល័យពូជសាសន៍។

នៅពេលនិយាយអំពើប្រល័យពូជសាសន៍ហូឡូខូស វាបានរំលឹកយើងពីទុក្ខវេទនា និងការសម្លាប់រង្គាលនៃរបបប្រល័យពូជសាសន៍ប៉ុលពតនៅកម្ពុជា ដែលបានបន្សល់ទុករបួសផ្លូវចិត្តយូរអង្វែង នៃរបបដ៏ខ្មៅងងឹតមួយនេះរហូតមកដល់សព្វថ្ងៃ៕