ព្រលានយន្តហោះអន្តរជាតិសៀមរាប-​អង្គរ ​នឹង​ចាប់ផ្ដើម​ដំណើរ​ការសាកល្បង​នៅថ្ងៃទី១៦ តុលា​ ២០២៣​ដោយគ្មានកា​រផ្លាស់ប្តូរ

ភ្នំពេញ ៖ ​អាកាសយានដ្ឋានអន្តរជាតិ​សៀមរាប-​អង្គរ គ្រោងនឹង​ដំណើរការ​ហោះហើរ​សាកល្បង ( Soft Opening ) ​នៅថ្ងៃទី១៦ ខែតុលា ឆ្នាំ២០២៣​ខាងមុខ​នេះ​ហើយ ដោយមិនមានការ​ផ្លាស់ប្តូរនោះទេ ប៉ុន្តែ​កាល​បរិច្ឆេទនៃការ​សម្ពោធ​ជាផ្លូវការ​តែម្ដង នឹងត្រូវធ្វើឡើង​នៅថ្ងៃទី០១ ខែធ្នូ ​ឆ្នាំ២០២៣​ខាងមុខនេះ  ។ នេះ​បើ​តាម​​ឯកឧត្តម ស៊ីន​ ចាន់​សិរីវុត្ថា​ អ្នកនាំពាក្យ​រដ្ឋលេខាធិការដ្ឋានអាកាស​ចរ​ស៊ីវិល​នៅរសៀលថ្ងៃទី​០៤ តុលា ២០២៣​ ថ្លែងប្រាប់​ AMS Economy ​។​

ឯកឧត្តម​បានលើកឡើងថា​ នៅថ្ងៃទី០៥ តុលា ២០២៣​​នេះ គឺជាថ្ងៃបញ្ចប់​នៃការ​បង្ហាញ​ការ​ហោះហើរ​សាកល្បង ហើយ​នៅ​​ថ្ងៃទី​១៦​ តុលា​ ២០២៣​ នឹង​ចាប់ផ្ដើម​ដំណើ​រ​ការ​​ហោះហើរ​តែម្ដង ក្រោមអធិបតីភាព​ឯកឧត្តម​រដ្ឋមន្ត្រី​ទទួល​បន្ទុក​រដ្ឋលេខាធិការ​ដ្ឋានអាកាស​ចរស៊ីវិល ។ ដោយឡែក​សម្រាប់ការសម្ពោធ​ជាផ្លូវការ​វិញ បា​ន​លើកទៅថ្ងៃទី០១​ខែ ធ្នូ ២០២៣​ ក្រោមអធិបតីភាព​សម្ដេច​មហាបវរ​ធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ។

ឯកឧត្តមបញ្ជាក់ថា​ ៖

«​យើង​ចង់ដាក់​សម្ពោធ​ឆាប់នេះ​ ប៉ុន្តែ​ដោយ​សារ​តែ​ថ្នាក់ដឹក​នាំ លោក​មានធុរ​ជាច្រើននៅក្នុង​ខែ​តុលានេះ ដូច្នេះហើយ​ទើប​ត្រូវ​លើកពេល​សម្ពោធជាផ្លូវកា​របន្តិច​ តែសម្រាប់ដំណើរការ​ហោះហើរ គឺនៅរក្សា​ដដែល​​ដោយមិនមានកា​រលើកពេលនោះឡើយ​ ។ បច្ចុប្បន្ន​នេះ អាកាស​យានដ្ឋានអន្តរជាតិសៀមរាប​-អង្គរ​ បានរៀបចំរួចរាល់​នូវ​ហេដ្ឋារច​នា​ស​ម្ព័ន្ធទាំងខាង​ក្នុង និងខាងក្រៅ​ ហើយ​នៅ​ពេ​ល​​ដល់វេលា​នឹង​ផ្ដើម​តែម្ដង​ដោយមិនមានកា​រយឺត​យ៉ាវ​ ឬត្រូវលើកពេលនោះទេ​»។​

ក្នុងពេលអាកាស​យានដ្ឋាន​អន្តរជាតិនេះមិនទាន់ដំណើរការ​ផង ក៏មានក្រុមហ៊ុនអាកាស​ចរ​មួយចំនួន​បាន​ត្រៀមលក្ខណៈ​សម្បត្តិ​រួចរាល់​ក្នុងការ​តភ្ជាប់​ជើង​ហោះ​ហើរ​ពីសៀមរាប​ទៅកាន់​គោល​ដៅ នៃប្រទេស​ផ្សេង​ៗ ដូចជា​សម្រាប់ទៅអាកាស​យានដ្ឋានប្រទេស​ចិន និងពីសៀមរាប​ទៅអាកាស​យានដ្ឋាន​អន្តរជាតិប្រទេស​កូរ៉េ​ជាដើម ។

អាកាសយានដ្ឋានអន្តរជាតិ​សៀមរាប​ ត្រូវ​បាន​សាងសង់លើ​ផ្ទៃ​ដីប្រមាណ​៧០០ហិចតា​ ស្ថិតក្នុងភូមិ​ក្រៀល​ពង ឃុំពពេល និងភូមិប្រវ៉ាល ឃុំតាយ៉ែក ស្រុក​សូទ្រ​និគម ខេត្តសៀមរាប ជាមួយនឹងទុន​វិនិយោគ​ប្រមាណជាង​១ពាន់លានដុល្លា​រអាមេរិក ។​

អាកាសយានដ្ឋាននេះអាចមានសមត្ថភាពទទួលអ្នកដំណើរប្រមាណ ៧លាននាក់ក្នុងមួយឆ្នាំនៅក្នុង​ដំណាក់​កាលទី​១ ហើយ​នៅក្នុងដំ​ណា​ក់កា​លទី២ អាចទទួលអ្នក​ដំណើរ​ដល់ ១០លាននាក់ក្នុងមួយឆ្នាំ និង​ដំណាក់​កា​ល​ទី​៣ អាចទទួលអ្ន​កដំណើ​របា​នរហូតដល់ ២០លាននាក់នៅក្នុងមួយឆ្នាំ៕