យល់ដឹងពីភាពប្រឈម និងហានិភ័យសម្រាប់អ្នកប្រើប្រាស់សេវាហិរញ្ញវត្ថុក្រៅផ្លូវការ

ភ្នំពេញ ៖ សេវាហិរញ្ញវត្ថុក្រៅផ្លូវការ គឺសំដៅដល់សេវាហិរញ្ញវត្ថុដែលផ្តល់ដោយនីតិបុគ្គល ឬរូបវន្តបុគ្គលដែលពុំទទួលបានអាជ្ញាបណ្ណ ឬលិខិតអនុញ្ញាតពីអាជ្ញាធរហិញ្ញវត្ថុ (ធនាគារជាតិនៃកម្ពុជា ឬអាជ្ញាធរសេវាហិរញ្ញវត្ថុមិនមែនធនាគារ) ដើម្បីអាចផ្តល់សេវាហិរញ្ញវត្ថុជាប្រក្រតីដល់សាធារណជន។

សកម្មភាពមួយចំនួនដែលអាចសន្និដ្ឋានថា ជាសេវាហិរញ្ញវត្ថុក្រៅផ្លូវការរួមមាន៖ ការខ្ចីចងការប្រាក់ក្រៅប្រព័ន្ធ ការប្រមូលលុយរាប់តាមផ្សារ ការន្សំ និងកម្ចីក្នុងសហគមន៍ ការលេងតុងទីន ការប្រមូលប្រាក់សន្សំ ឬវិនិយោគដែលគ្មានច្បាប់អនុញ្ញាត និងការផ្តល់សេវាផ្ទេរ និងទូទាត់ប្រាក់ដែលគ្មានច្បាប់អនុញ្ញាតជាដើម។

ហានិភ័យចម្បងៗដែលនឹងកើតមានចំពោះអ្នកប្រើប្រាស់សេវាហិរញ្ញវត្ថុក្រៅផ្លូវការរួមមាន ៖

• ប្រឈមមុខនឹងការឆបោក ការកេងបន្លំ ហិង្សា ការគំរាមកំហែង និងការរំលោភបំពាន ដោយសារប្រតិបត្តិការទាំងនោះពុំស្ថិតក្រោមច្បាប់ និងមិនត្រូវបានត្រួតពិនិត្យ ដោយនិយ័តករ ឬអាជ្ញាធរ។ កិច្ចសន្យា និងលក្ខខណ្ឌពាក់ព័ន្ធ មានលក្ខណៈបោកបញ្ឆោត មិនមានសុចរិតភាព និងដាក់បន្ទុកធ្ងន់ធ្ងរទៅកាន់អតិថិជន

• ប្រឈមមុខនឹងការខាតបង់ហិរញ្ញវត្ថុ ដោយសារអត្រាការប្រាក់ និងកម្រៃសេវាផ្សេងៗខ្ពស់ និងមិនមានតម្លាភាព

• ប្រឈមមុខនឹងការរឹបអូស និងលក់ឡៃឡុងលើទ្រព្យបញ្ចាំ ដោយពុំឆ្លងកាត់សេចក្តីសម្រេចរបស់តុលាការ

• ប្រឈមមុខនឹងការលេចធ្លាយព័ត៌មានបុគ្គលជាសាធារណៈ ឬនៅតាមបណ្តាញសង្គម ព្រមទាំងអាចក្លាយជាកម្មវត្ថុនៃការគំរាមកំហែងជាដើម។

ទន្ទឹមនេះ ជនរងគ្រោះដោយកម្ចីក្រៅផ្លូវការ និងខុសច្បាប់ អាចរាយការណ៍មកកាន់អគ្គស្នងការដ្ឋាននគរបាលជាតិ តាមរយៈទូរសព្ទលេខ ០២៣ ៧២ ៦៨ ២២ ហើយដើម្បីចៀសវាងនូវបាតុភាពដូចដែលបានរៀបរាប់ខាងលើ ពលរដ្ឋទូទៅគួរទទួលយកឥណទានជាមួយនឹងគ្រឹះស្ថាន ដែលមានការអនុញ្ញាតពីធនាគារជាតិនៃកម្ពុជាតែប៉ុណ្ណោះ៕