Donald Trump ផ្អាកជំនួយថវិកា និងកម្មវិធីមូលនិធិហិរញ្ញវត្ថុផ្សេងៗសម្រាប់ពលរដ្ឋអាម៉េរិកជាបណ្តោះអាសន្ន

បរទេស៖ យោងតាមប្រភពព័ត៌មានពីបាងកកប៉ុស្តិ៍ បានចេញផ្សាយថា ប្រធានាធិបតីអាម៉េរិក លោក Donald Trump បានបញ្ជាឱ្យផ្អាកការផ្តល់ថវិកាជំនួយ និងកម្មវិធីមូលនិធិហិរញ្ញវត្ថុផ្សេងៗដែលមានទំហំរាប់ពាន់លានដុល្លារដល់ពលរដ្ឋអាមេរិក ដែលបង្កឱ្យមានការចោទប្រកាន់ថាគាត់កំពុងបំពានរដ្ឋធម្មនុញ្ញ ដោយសារវាប៉ះពាល់ស្ទើរគ្រប់ផ្នែកនៃសង្គម គិតចាប់ពីជំនួយផ្នែកអប់រំ រហូតដល់កម្ចីអាជីវកម្មខ្នាតតូច។

រយៈពេលមួយសប្តាហ៍នៃការចូលកាន់តំណែងក្នុងអាណត្តិទី២របស់ខ្លួន លោក Trump បានបញ្ជាទៅការិយាល័យថវិការបស់សេតវិមានឱ្យផ្អាកការផ្តល់ជំនួយដូចបានលើកឡើងខាងលើ ហើយត្រូវបានអនុម័តរួចរាល់ក្រោមការចុះហត្ថលេខាដោយលោក Matthew Vaeth នាយកស្តីទីនៃការិយាល័យគ្រប់គ្រង និងថវិកា (OMB) ប៉ុន្តែគេមិនច្បាស់ថា តើការផ្អាកការផ្តល់មូលនិធិបែបនេះមានរយៈពេលប៉ុន្មាននោះទេ។

តាមរយៈអនុស្សរណៈ OMB បានបញ្ជាក់ថា ភ្នាក់ងារសហព័ន្ធត្រូវតែផ្អាកជាបណ្តោះអាសន្ននូវសកម្មភាពទាំងអស់ដែលទាក់ទងនឹងកាតព្វកិច្ច ឬការផ្តល់ជំនួយហិរញ្ញវត្ថុរបស់សហព័ន្ធទាំងអស់ រួមទាំងសកម្មភាពភ្នាក់ងារពាក់ព័ន្ធផ្សេងទៀត។ សកម្មភាពដែលអាចរងផលប៉ះពាល់រួមមាន៖ ជំនួយហិរញ្ញវត្ថុសម្រាប់ជំនួយបរទេស អង្គការក្រៅរដ្ឋាភិបាល DEI ជំនួយខាងយេនឌ័រ និងកិច្ចព្រមព្រៀងបរិស្ថានបៃតង ផ្អែកទៅលើការប្តេជ្ញាចិត្តរបស់ Trump ក្នុងការលុបបំបាត់កម្មវិធីសមភាពជាតិសាសន៍ និងការប្រែប្រួលអាកាសធាតុ។ យ៉ាងណាមិញ អត្ថប្រយោជន៍សន្តិសុខសង្គម និងការថែទាំផ្នែកសុខាភិបាលដែលប្រើដោយអ្នកចូលនិវត្តន៍មិនត្រូវបានផ្អាកនោះទេ។

មន្ត្រីរដ្ឋបាលជាន់ខ្ពស់របស់ Trump បានលើកឡើថា ការបញ្ឈប់ការផ្តល់មូលនិធិគឺជាវិធីសាស្ត្រមួយដើម្បីពង្រឹងការអនុលោមតាមច្បាប់ ហើយកម្មវិធីដែលមិនមានជម្លោះជាមួយ Trump អាចនឹងទទួលបានមូលនិធិរបស់ពួកគេបន្ត។

យ៉ាងណាមិញ ការផ្អាកការផ្តល់មូលនិធិទាំងនេះបានទទួលរងនូវការរិះគន់ក្នុងចំណោមអ្នកដែលទទួលជំនួយរបស់រដ្ឋាភិបាលសហរដ្ឋអាម៉េរិក។ លើសពីនេះ វាក៏បានបង្កឱ្យមានការចោទប្រកាន់ពីគណបក្សប្រជាធិបតេយ្យថា Trump កំពុងបំពានរដ្ឋធម្មនុញ្ញដោយក្តាប់អំណាចរបស់សភាក្នុងការគ្រប់គ្រងថវិការបស់សហរដ្ឋអាម៉េរិក។ នៅក្នុងសារពើពន្ធឆ្នាំ២០២៤ ការចំណាយរបស់រដ្ឋាភិបាលសហរដ្ឋអាម៉េរិក គិតទាំងជំនួយ និងប្រាក់កម្ចីមានចំនួនប្រហែល ៣ ទ្រីលានដុល្លារ ដែលទាំងអស់នេះត្រូវបានអនុញ្ញាតដោយសភា។

ទន្ទឹមនឹងនេះ សមាជិកព្រឹទ្ធសភានៃគណបក្សប្រជាធិបតេយ្យ លោកស្រី Patty Murray បានចាត់ទុកការចេញបទបញ្ជារបស់សេតវិមាននេះថាជាទង្វើខុសច្បាប់។ គាត់បានបង្ហោះនៅលើបណ្តាញសង្គមថា ៖

«ច្បាប់ គឺជាច្បាប់ ហើយ Trump ត្រូវតែផ្លាស់ប្តូរវិធីសាស្រ្តរបស់គាត់ភ្លាមៗ ដើម្បីគោរពទៅតាមបទប្បញ្ញត្តិ និងធានាថា ច្បាប់ចំណាយរបស់ប្រទេសត្រូវបានអនុវត្តស្របតាមផែនការរបស់សភា»។

សមាជិកព្រឹទ្ធសភាម្នាក់ទៀត លោក Richard Blumenthal លើកឡើងថា បទបញ្ជាខុសច្បាប់នឹងបង្កផលប៉ះពាល់ធ្ងន់ធ្ងរដល់ផ្នែកវេជ្ជសាស្ត្រ និងស្រាវជ្រាវ ដែលទទួលបានមូលនិធិពីរដ្ឋាភិបាល។

ស្រដៀងគ្នានេះ សមាជិកព្រឹទ្ធសភាម្នាក់ទៀត លោក Chris Van Hollen ក៏បានសរសេរនៅលើបណ្តាញសង្គមដែរថា នេះគឺជាការបំផ្លិចបំផ្លាញផ្នែកនយោបាយ ហើយការដាក់បញ្ជាទៅភ្នាក់ងាររដ្ឋាភិបាលមិនបានធ្វើឱ្យរដ្ឋាភិបាលចំណេញអ្វីនោះទេ ប៉ុន្តែវាកំពុងបង្កការខូចខាតយ៉ាងធ្ងន់ធ្ងរដល់មនុស្ស និងកម្មវិធីនានានៅទូទាំងប្រទេស។

Sierra Club ដែលជាអង្គការបរិស្ថានបានលើកឡើងថា ការបង្កកមូលនិធិពីរដ្ឋាភិបាលអាចបង្កគ្រោះថ្នាក់ដល់អ្វីៗគ្រប់យ៉ាងគិតចាប់ពីជំនួយសង្គ្រោះពីគ្រោះមហន្តរាយ រហូតដល់ការឧបត្ថម្ភធនសម្រាប់កំដៅផ្ទះ កម្មវិធីទឹកស្អាត និងបណ្តាញទូរស័ព្ទទាន់ហេតុការណ៍បង្ការការធ្វើអត្តឃាត។ ជាលទ្ធផល វានឹងធ្វើឱ្យពលរដ្ឋអាមេរិកស្ថិតក្នុងគ្រោះថ្នាក់យ៉ាងខ្លាំង៕