កំណើនសេដ្ឋកិច្ចថៃកើនឡើងលើសពីការព្យាករណ៍ ប៉ុន្តែកំពុងប្រឈមនឹងបញ្ហាមួយចំនួន

បាងកក ៖ យោងតាមប្រភពព័ត៌មានពីបរទេសបានរាយការណ៍ថា កំណើនសេដ្ឋកិច្ចថៃនៅក្នុងត្រីមាសទី ២ ឆ្នាំនេះ បានកើនឡើងលើសពីការព្យាករណ៍ ប៉ុន្តែក៏កំពុងប្រឈមនឹងបញ្ហាមួយចំនួនផងដែរ។

ទិន្នន័យពីក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិរបស់ថៃ (NEDC) បានបង្ហាញថា ផលិតផលក្នុងស្រុកសរុបក្នុងអំឡុងខែមេសា ដល់ខែមិថុនាបានកើនឡើង ២,៣ ភាគរយ បើធៀបនឹងពេលដូចគ្នាកាលពីឆ្នាំមុន។ តួរលេខនេះកើនឡើងពី ១,៦ ភាគរយនៅក្នុងត្រីមាសទី១ និងលើសពីការព្យាករណ៍របស់អ្នកវីភាគសេដ្ឋកិច្ច ២,១ ភាគរយ។ NEDC បានលើកឡើងដែរថា ទោះបីជាការវិនិយោគសាធារណៈ និងឯកជនមានការថយចុះ ប៉ុន្តែកំណើនសេដ្ឋកិច្ចថៃត្រូវបានជំរុញដោយការចំណាយរបស់រដ្ឋាភិបាល ការប្រើប្រាស់របស់វិស័យឯកជន ការនាំចេញទំនិញ និងសេវាកម្ម។ NESDC បានបង្ហាញពីក្ដីរំពឹងថា កំណើនផលិតផលក្នុងស្រុកសរុបរបស់ថៃអាចកើនឡើងពីចន្លោះ ២,៣ ភាគរយទៅ ២,៨ ភាគរយនៅឆ្នាំនេះ។

ទោះជាយ៉ាងណាក្តី ប្រទេសថៃក៏កំពុងប្រឈមមុខនឹងបញ្ហាដែលប៉ះពាល់ដល់សេដ្ឋកិច្ចរបស់ខ្លួនដែរ រួមមាន ភាពមិនច្បាស់លាស់ផ្នែកនយោបាយ និងការផ្លាស់ប្តូរប្រជាសាស្រ្ត ដោយសារចំនួនប្រជាជនវ័យចំណាស់ និងការថយចុះអត្រាកំណើតកំពុងប៉ះពាល់ដល់អំណាចទិញក្នុងស្រុក និងប៉ះពាល់ដល់អាជីវកម្ម។

លោក Shivaan Tandon សេដ្ឋវិទូមកពី Capital Economics បាននិយាយថា កំណើនសេដ្ឋកិច្ចថៃអាចនឹងថយចុះបន្តិចនៅត្រីមាសខាងមុខ ដោយសារការជំរុញពីវិស័យទេសចរណ៍ធ្លាក់ចុះ ជាមួយនឹងភាពមិនច្បាស់លាស់ជុំវិញគោលនយោបាយសារពើពន្ធកំពុងកើនឡើង។ ទន្ទឹមនឹងនេះ ធនាគារកណ្តាលបានទុកអត្រាការប្រាក់សំខាន់របស់ខ្លួនមិនផ្លាស់ប្តូរនៅកម្រិតខ្ពស់ជាងមួយទសវត្សរ៍ ២,៥ ភាគរយនៅក្នុងកិច្ចប្រជុំជាប់ៗគ្នា ៤ លើកនៅក្នុងខែមិថុនា ហើយគេរំពឹងថានឹងបន្តរក្សាអត្រាការប្រាក់ទៀតនៅក្នុងកិច្ចប្រជុំរបស់ខ្លួននៅក្នុងសប្ដាហ៍ទី៣នៃខែសីហា នេះ ។ មិនត្រឹមតែប៉ុណ្ណោះ សេដ្ឋកិច្ចថៃកំពុងប្រឈមមុខនឹងបំណុលគ្រួសារខ្ពស់ កម្ចីប្រាក់ថ្លៃ និងការនាំចេញទៅចិនធ្លាក់ចុះ។

លោក Pichai Chunhavajira រដ្ឋមន្ត្រីក្រសួងហិរញ្ញវត្ថុថៃ បានលើកឡើងថា សេដ្ឋកិច្ចរបស់ប្រទេសថៃស្ទើរតែស្ថិតក្នុងវិបត្តិដោយសារតែការធ្លាក់ចុះនៃការនាំចេញ និងការផលិតដែលមិនមានភាពប្រកួតប្រជែង។ ការនាំចេញមានចំណែក ៧០ ភាគរយនៃសេដ្ឋកិច្ច ប៉ុន្តែវិស័យផលិតកម្មមិនអាចបំពេញតម្រូវការទីផ្សារបានទេ៕