មូលនិធិរូបិយវត្ថុអន្តរជាតិ (IMF) បង្ហាញពីតួលេខនៃការព្យាករមកលើសេដ្ឋកិច្ចពិភពលោក

បរទេស៖ យោងតាមប្រភពព័ត៌មានពី Business Standard បានរាយការណ័៍ថា មូលនិធិរូបិយវត្ថុអន្តរជាតិ (IMF) បានផ្តល់នូវទស្សនវិស័យសេដ្ឋកិច្ចវិជ្ជមានសម្រាប់សហរដ្ឋអាមេរិកនៅឆ្នាំនេះ ខណៈពេលដែលបន្ថយការរំពឹងទុករបស់ខ្លួនសម្រាប់កំណើនសេដ្ឋកិច្ចនៅអឺរ៉ុប និងមហាយក្សចិន។

កាលពីថ្ងៃអង្គារ៍កន្លងទៅ IMF បានព្យាករណ៍ថា សហរដ្ឋអាម៉េរិកនៅបន្តរក្សាតំណែងជាក្បាលម៉ាស៊ីនសេដ្ឋកិច្ចពិភពលោក ដោយសារសេដ្ឋកិច្ចអាមេរិកនឹងកើនឡើង ២,៨ ភាគរយនៅឆ្នាំ២០២៤។ តួលេខនេះ បើទោះបីជាធ្លាក់ចុះបន្តិចពីកំណើន ២,៩ ភាគរយកាលពីឆ្នាំ២០២៣ ក៏ដោយ ប៉ុន្តែវាមានភាពប្រសើរជាងការព្យាករណ៍លើកមុនរបស់ IMF ដែលមានត្រឹម ២,៦ ភាគរយ។ កំណើនសេដ្ឋកិច្ចសហរដ្ឋអាមេរិកត្រូវបានជំរុញដោយការចំណាយរបស់អ្នកប្រើប្រាស់ដ៏រឹងមាំ។ យ៉ាងណាមិញ IMF បានកាត់បន្ថយការព្យារណ៍របស់ខ្លួនថា កំណើនសេដ្ឋកិច្ចអាមេរិកនឹងធ្លាក់ចុះមកនៅត្រឹម ២,២ ភាគរយនៅឆ្នាំ ២០២៥ ។ ជាមួយនឹងរដ្ឋបាលប្រធានាធិបតីថ្មី IMF យល់ឃើញថា ទីផ្សារការងាររបស់ប្រទេសនឹងបាត់បង់សន្ទុះខ្លះនៅឆ្នាំ២០២៥ ពោលគឺនៅពេលដែលរដ្ឋាភិបាលចាប់ផ្តើមស្វែងរកវិធីទប់ស្កាត់ឱនភាពថវិកាដ៏ធំដោយអាចនឹងការបន្ថយការចំណាយ ការដំឡើងពន្ធ ឬ ការអនុវត្តវិធីទាំងពីររួមគ្នា។

លើសពីនេះ IMF បានព្យាករណ៍ថា កំណើនសេដ្ឋកិច្ចចិននឹងមានអត្រា ៤,៨ ភាគរយនៅឆ្នាំ២០២៤នេះ និង ៤,៥ ភាគរយនៅឆ្នាំ២០២៥ ដែលធ្លាក់ចុះពី ៥,២ ភាគរយកាលពីឆ្នាំ២០២៣។ ការធ្លាក់ចុះកំណើនសេដ្ឋកិច្ចប្រទេសមហាអំណាចធំជាងគេទី២របស់ពិភពលោកមួយនេះបណ្តាលមកពីការធ្លាក់ចុះនៃទំនុកចិត្តអ្នកប្រើប្រាស់ និងវិបត្តិអចលនទ្រព្យ។ ក្រៅពីនេះ IMF បានព្យាករណ៍ថា តម្លៃ​ប្រាក់អឺរ៉ូរបស់សហភាពអឺរ៉ុបនឹងកើនឡើង ០,៨ ភាគរយនៅឆ្នាំនេះ ដែលកើនឡើងពី ០,៤ ភាគរយនៅឆ្នាំ២០២៣។ យ៉ាងណាមិញ តួរលេខនេះធ្លាក់ចុះបន្តិចពីការព្យារកណ៍លើកមុន ០​,៩ ភាគរយ។ មិនត្រឹមតែប៉ុណ្ណោះ សេដ្ឋកិច្ចអាល្លឺម៉ង់ដែលរងគ្រោះដោយការធ្លាក់ចុះនៃផលិតកម្ម និងអចលនទ្រព្យ មិនត្រូវបានរំពឹងថាកើនឡើងនោះទេនៅក្នុងឆ្នាំនេះ។

ទោះជាយ៉ាងណាក្តី​ IMF បានព្យាករណ៍ដែរថា អតិផរណានៅទូទាំងពិភពលោកកំពុងធ្លាក់ចុះពី ៦,៧ ភាគរយនៅឆ្នាំ២០២៣ មកត្រឹម ៥,៨ ភាគរយនៅឆ្នាំនេះ និងបន្តថយចុះដល់ ៤,៣ ភាគរយនៅឆ្នាំ ២០២៥ ។ លើសពីនេះ អតិផរណានឹងធ្លាក់ចុះកាន់តែលឿននៅក្នុងប្រទេសអ្នកមានពី ៤,៦ ភាគរយកាលពីឆ្នាំមុនមកត្រឹម ២,៦ ភាគរយនៅឆ្នាំនេះ។ IMF មើលឃើញថា ការខិតខំប្រឹងប្រែងប្រឆាំងនឹងអតិផរណាបានជំរុញឱ្យធនាគារកណ្តាលអាម៉េរិក (Fed) និងធនាគារកណ្តាលអឺរ៉ុប (ECB) កាត់បន្ថយអត្រាការប្រាក់ ហើយពួកគេស្ទើរតែអាចយកឈ្នះលើអតិផរណាបានទាំងស្រុង។

Pierre-Olivier Gourinchas ប្រធានសេដ្ឋវិទូរបស់ IMF បានលើកឡើថា ការប្រយុទ្ធប្រឆាំងនឹងអតិផរណាគឺស្ទើរតែទទួលបានជ័យជំនោះ ខណៈដែលអតិផរណានៅក្នុងប្រទេសភាគច្រើនកំពុងខិតជិតដល់គោលដៅរបស់ធនាគារកណ្តាល។ យ៉ាងណាមិញ IMF ក៏បានព្រមានដែរថា ទោះបីជាការចំណាយលើការខ្ចីប្រាក់មានអត្រាទាប ផ្តល់អត្ថប្រយោជន៍ដល់សេដ្ឋកិច្ចជុំវិញពិភពលោក ប៉ុន្តែកំណើនប្រហែលជានឹងថយចុះផងដែរ ដោយសារឱនភាពថវិការរបស់រដ្ឋាភិបាល។ សេដ្ឋកិច្ចពិភពលោកត្រូវបានព្យាករណ៍ថានឹងកើនឡើង ៣,២ ភាគរយទាំងក្នុងឆ្នាំ២០២៤ និងឆ្នាំ២០២៥ ដែលទាបជាងអត្រាកំណើន ៣,៣ ភាគរយក្នុងឆ្នាំ២០២៣។ មុនពេលដែលមានការរាតត្បាតរំខានដល់សកម្មភាពសេដ្ឋកិច្ច កំណើនសេដ្ឋកិច្ចសកលមានជាមធ្យមក្នុងអត្រា ៣,៨ ជារៀងរាល់ឆ្នាំនៅចន្លោះឆ្នាំ ២០០០ និង ២០១៩។

ទន្ទឹមនឹងនេះ មូលនិធិរូបិយវត្ថុអន្តរជាតិ IMF បន្តសម្តែងការព្រួយបារម្ភថា ភាពតានតឹងភូមិសាស្ត្រនយោបាយរួមមាន ការប្រឆាំងគ្នារវាងសហរដ្ឋអាមេរិក និងចិន អាចធ្វើឱ្យពាណិជ្ជកម្មពិភពលោកមិនសូវមានប្រសិទ្ធភាព។ ជាងនេះទៅទៀត ប្រទេសជាច្រើនទៀតនឹងធ្វើអាជីវកម្មកាន់តែខ្លាំងឡើងជាមួយសម្ព័ន្ធមិត្តរបស់ពួកគេជាជាងស្វែងរកទំនិញបរទេសដែលមានតម្លៃទាប។ ទោះបីជាយ៉ាងណាក្តី IMF ព្យាករណ៍ថា ពាណិជ្ជកម្មសកលនឹងកើនឡើង ៣,‌១ ភាគរយនៅឆ្នាំនេះ និង ៣,៤ ភាគរយនៅឆ្នាំ២០២៥៕