រថយន្តអគ្គិសនីម៉ូដថ្មីរបស់ Xiaomi ទទួលបានការបញ្ជាទិញជាង ២សែនគ្រឿងបន្ទាប់ពីប្រកាសដាក់លក់បានត្រឹមតែ ៣នាទី

បរទេស៖​ យោងតាមប្រភពព័ត៌មានពី CNBC បានរាយការណ៍ថា ភាគហ៊ុនរបស់ក្រុមហ៊ុនចិន Xiaomi របស់ចិនកើនឡើងជាង ៥% បន្ទាប់ពីដាក់លក់រថយន្តអគ្គិសនីម៉ូដថ្មីរបស់ខ្លួនកាលពីថ្ងៃព្រហស្បតិ៍ ដែលទទួលបានការពេញចិត្តយ៉ាងខ្លាំងពីអតិថិជន។

Xiaomi គឺជាអ្នកលេងថ្មីនៅក្នុងទីផ្សារ EV ប៉ុន្តែបានដាក់គោលដៅប្រជែងជាមួយនឹង Tesla ដោយបានបញ្ចេញរថយន្តអគ្គិសនីទំនើបរបស់ខ្លួនម៉ូឌែល YU7 ។

នាយកប្រតិបត្តិក្រុមហ៊ុន លោក Lei Jun បញ្ជាក់ថា តម្លៃរបស់រថយន្តមានចាប់ពី ២៥៣ ០០០ យ័ន (៣៥ ៣២២ ដុល្លារ) ដែលជាតម្លៃថោកជាងម៉ូឌែល Y របស់ក្រុមហ៊ុន Tesla ១ ម៉ឺនយ័ន។ រថយន្តម៉ូឌែលថ្មី YU7 ទទួលការបញ្ជាទិញច្រើនជាង ២ សែនគ្រឿងក្នុងរយៈពេលត្រឹមតែ ៣ នាទី បន្ទាប់ពីត្រូវបានដាក់លក់កាលពីថ្ងៃព្រហស្បតិ៍។ មុនពេលប្រកាសតម្លៃជាផ្លូវការ របាយការណ៍ពី Citi បានព្យាករណ៍ថា រថយន្ត YU7 នឹងមានតម្លៃប្រហែល ២៥០ ០០០ យ័ន ទៅ ៣២០ ០០០ យ័ន (៣៤ ៨០០ ដុល្លារ ទៅ ៤៤ ៥៩០ ដុល្លារ)។ លើសពីនេះ របាយការណ៍រំពឹងថា ការលក់ប្រចាំខែអាចនឹងមានប្រហែល ៣ ម៉ឺនគ្រឿង ហើយការលក់ប្រចាំឆ្នាំអាចកើនឡើងពី ៣០០ ០០០ គ្រឿងទៅ ៣៦០ ០០០ គ្រឿង។

លោក Lei Jun ​អះអាង​ថា ម៉ូឌែល YU7 ភ្ជាប់មកជាមួយកម្មវិធីជំនួយអ្នកបើកបរ ដំណើរការដោយបន្ទះឈីប Thor របស់ Nvidia ។ កាលពីដំបូង Xiaomi មានគម្រោងចេញលក់ម៉ូឌែល YU7 នៅក្នុងខែកក្កដា ប៉ុន្តែជាក់ស្តែង ម៉ូឌែលនេះត្រូវបានបញ្ចេញកាលពីចុងខែឧសភា។ Xiaomi អះអាងថា រថយន្តនេះអាចបើកបរបានចម្ងាយយ៉ាងហោចណាស់ ៧៦០ គីឡូម៉ែត្រ បន្ទាប់ពីការសាកថ្មបានម្តង លើសពីចម្ងាយ ៧១៩ គីឡូម៉ែត្ររបស់រថយន្ត Tesla ដែលអ្នកប្រើប្រាស់មានការព្រួយបារម្ភអំពីការសាកថ្មញឹកញាប់។

យ៉ាងណាក៏ដោយ បើទោះបីជាក្រុមហ៊ុន Xiaomi មិនបានផ្សព្វផ្សាយពីសមត្ថភាព AI របស់ខ្លួនដូចម៉ាកយីហោផ្សេងទៀត ប៉ុន្តែព្រឹត្តិការណ៍សម្ពោធកាលពីថ្ងៃព្រហស្បតិ៍ម្សិលមិញនេះបានបង្ហាញពីលក្ខណៈពិសេសរបស់ AI ជាច្រើននៅក្នុងរថយន្ត ដូចជា ការអនុញ្ញាតឱ្យអ្នកបើកបរផ្លាស់ប្តូរបទចម្រៀងដោយប្រើចលនាដៃ ឬ សួរកម្មវិធីដើម្បីរកកន្លែងចត។ លើសពីនេះ YU7 ក៏អាចប្រើប្រាស់ Apple Car Play និង Apple Music បានផងដែរ៕