រុក្ខជាតិផ្អាវ ជារុក្ខជាតិដុះក្នុងព្រៃដែលអាចផ្តល់កម្រៃបន្ថែមដល់ប្រជាសហគមន៍

សៀមរាប៖ ផ្អាវ ជារុក្ខជាតិម្យ៉ាងដែលមានបន្លា និងមានលក្ខណៈបែកជាគុម្ពដូចឫស្សីដែរ ដែលកូនផ្អាវខ្ចីៗគេអាចយកទៅច្នៃធ្វើជាបន្លែសម្រាប់ម្ហូបបានច្រើនមុខ។ ជាមួយគ្នានេះ ដោយសារតែរសជាតិរបស់រុក្ខជាតិផ្អាវមានភាពទាក់ទាញបានជំរុញឱ្យប្រជាកសិករមួយចំនួននៅខេត្តសៀមរាប នាំគ្នារុករកកូនរុក្ខជាតិផ្អាវយកមកដាក់លក់ដើម្បីរកប្រាក់ចំណូលបន្ថែមពីការធ្វើស្រូវនារដូវវស្សា។

អ្នកស្រី ម៉ាឡែន ដែលកំពុងអង្គុយដាក់លក់ចុងផ្អាវម្នាក់ស្ថិតនៅភូមិខ្នារ ឃុំខ្នារសណ្ដាយ ស្រុកបន្ទាយស្រី ខេត្តសៀមរាប បានប្រាប់ AMS ឱ្យដឹងថា ៖ ការលក់ចុងផ្អាវនេះភាគច្រើននៅរដូវវស្សាដែលជារដូវសម្បូរផ្អាវដុះ ហើយការលក់នេះដែរក៏សូវមិនទៀងទាត់នោះដែរ ដែលថ្ងៃខ្លះរកបានច្រើន ហើយថ្ងៃខ្លះរកបានតិច ប៉ុន្តែចំណូលដែលលក់បានគ្រប់គ្រាន់នឹងចាយប្រចាំថ្ងៃដែរ។ 

អ្នកស្រីបន្តថា ៖

“ចុងផ្អាវនេះយើងលក់បានពី ១៥០០-២០០០រៀល ក្នុងមួយចុង ដែលផ្អាវនេះយើងទិញបន្តពីអ្នកដែលគេរកនៅតាមដីដែលមានដុះជាគុម្ពៗ ហើយកាប់យកតែចុងផ្អាវ ដោយទុកគល់ឱ្យវាលូតលាស់បន្តដូចឫស្សីដែរ។ សម្រាប់ការលក់វិញ មិនអាចកំណត់ថាលក់បានប៉ុន្មានចុងនោះទេក្នុងមួយថ្ងៃ វាអាស្រ័យលើបរិមាណផ្អាវដែលរកបានផង និងចំនួនអ្នកដែលធ្វើដំណើរឆ្លងកាត់តំបន់នេះផងដែរ។”

សម្រាប់អតិថិជនដែលនិយមទិញចុងផ្អាវភាគច្រើនជាអ្នករស់នៅក្នុងភូមិ និងអ្នកធ្វើដំណើរឆ្លងកាត់ដែលធ្លាប់ស្គាល់ ដោយគេទិញយកទៅស្លដូចជា​សម្លកកូរ ម្ជូរ ឬធ្វើជាជ្រក់ផ្អាវជាដើម។

ក្រៅពីផ្អាវ អ្នកស្រីក៏មានលក់បន្លែបន្ទាប់បន្សំផ្សេងទៀតដូចជា ទំពាំង ខ្ជាយ ដែលជាដំណាំអាចរកបានជិតៗផ្ទះយកមកដាក់លក់នៅក្នុងតូបមុខផ្ទះ ដើម្បីទាក់ភ្នែកអ្នកធ្វើដំណើរដែលជិះឆ្លងកាត់ឱ្យមកជួយចូលទិញ។

គួរបញ្ជាក់ដែរថា រុក្ខជាតិផ្អាវ ក្រៅពីដណ្ដូលខ្ចីៗដែលគេនិយមយកទៅស្លជាសម្លបានយ៉ាងឆ្ងាញ់ពិសានោះ គេក៏អាចយកដើមវាធ្វើជាឱសថសម្រាប់ព្យាបាលជំងឺរបេង ដោយឡែកសម្រាប់ឫសរបស់វាគេអាចយកធ្វើជាឱសថជួយរក្សាគក៌ ខណៈដែលស្លឹករបស់វាគេប្រើសម្រាប់ខ្ចប់ ឬវេចនំ ចាក់ធ្វើជាមួក ប្រក់ដំបូល ជញ្ជាំងផ្ទះ និងធ្វើជាកន្ទេលផងដែរ៕