Haiphong ជាទីក្រុងកំពង់ផែគំរូ ដែលកំពុងទាញប្រយោជន៍យ៉ាងខ្លាំងចេញពីជម្លោះពាណិជ្ជកម្មចិន-អាមេរិក

បរទេស ៖ ជម្លោះពាណិជ្ជកម្មអាចជាបញ្ហាសម្រាប់ប្រទេសជាច្រើនលើពិភពលោក ប៉ុន្តែវាក៏អាចជាឱកាសសម្រាប់ប្រទេសមួយចំនួនផងដែរនៅពេលដែលមហាយក្សសេដ្ឋកិច្ចធំៗចាប់ផ្តើមធ្វើការតម្លើងពន្ធនិងប្រកួតប្រជែងគ្នាលើការនាំចូលផលិតផលនានា។

រយៈពេលមិនដល់មួយទសវត្សរ៍ ទីក្រុង Haiphong បានកសាងកេរ្ត៍ឈ្មោះក្លាយទៅជាទីក្រុងកំពង់ផែដ៏មមាញឹកបំផុតមួយក្នុងចំណោមទីក្រុងផ្សេងទៀតរបស់ពិភពលោកដោយក្នុងនោះអាចនាំទំនិញគ្រប់ប្រភេទចេញពីវៀតណាមដល់ទៅ២៦ពាន់លានដុល្លារជារៀងរាល់ឆ្នាំ និងក្លាយទៅជាកម្លាំងស្នូលនៃកំណើនសេដ្ឋកិច្ចជាតិរបស់វៀតណាមថែមទៀតផង។

Haiphong ទីក្រុងសមុទ្រភាគខាងជើងនៃប្រទេសវៀតណាមធ្លាប់តែជាទីក្រុងសម្រាប់ទេសចរណ៍ និងការនេសាទត្រី ព្រមទាំងអាជីវកម្មធម្មតាអស់រយៈពេលជាយូរមកហើយ ប៉ុន្តែទីក្រុងនេះបានប្រែផ្លាស់ប្តូររូបរាងយ៉ាងខ្លាំងនៅក្រោយជម្លោះពាណិជ្ជកម្មរវាងអាមេរិក និងចិនកាលពីអាណត្តទី១របស់លោកប្រធានាធិបតីអាមេរិក Donald Trump។

រោងចក្រជាច្រើនរបស់អាមេរិកត្រូវបានផ្លាស់ប្តូរទីតាំងចេញពីប្រទេសចិនតាមការអំពាវនាវដោយលោក Trump ដោយផ្ទាល់ ដោយក្នុងនោះមានទាំងក្រុមហ៊ុនអ្នកផ្គត់ផ្គង់គ្រឿងបង្គុំរបស់ Apple ព្រមទាំងក្រុមហ៊ុន Deep C ដែលបានវិនិយោគលុយរាប់ពាន់លានដុល្លាររៀបចំទីតាំងសួនឧស្សាហកម្មទ្រង់ទ្រាយធំនៅទីក្រុងនេះ ។

Deep C បាននាំយកអតិថិជនរបស់ខ្លួនដែលជាក្រុមហ៊ុនអ្នកផលិតជាង១៧០ បូករួមទាំង Pegatron និង Foxconn​ផងដែរ ។ ជាលទ្ធផល មិនដល់ប៉ុន្មានឆ្នាំផង ទីក្រុង Haiphong ទទួលបានកញ្ចប់វិនិយោគជាបន្តបន្ទាប់ទៅលើវិស័យធំជាច្រើន ជាពិសេសហេដ្ឋារចនាសម្ព័ន្ធដឹកជញ្ជូនដ៏ទំនើបបំផុតមួយក្នុងតំបន់។

ឆ្នាំ២០១៨ ផែសមុទ្រទឹកជ្រៅរបស់ទីក្រុងចាប់ផ្តើមប្រតិបត្តិការដឹកទំនិញដែលជាផលិតផលជាច្រើនសំដៅទៅក្រៅប្រទេសដែលក្នុងនោះអាមេរិកជាគោលដៅសំខាន់ និងច្រើនជាងគេ ខណៈដែលតាមផ្លុវគោកគឺទៅទីក្រុង Shenzhen ដែលជាទីក្រុងបច្ចេកវិទ្យាទំនើបបំផុតមួយរបស់ប្រទេសចិន ដោយមានប្រវែងធ្វើដំណើរត្រឹមតែ ៤៨៨ ម៉ាល ឬប្រមាណជា ៧៨៥គីឡូម៉ែត្រប៉ុណ្ណោះ។

នៅឆ្នាំដដែល Haiphong ទទួលបានចំណងដៃដ៏ថ្មីស្រឡាងមួយទៀតគឺជាខ្សែរថភ្លើងធ្វើដំណើរត្រង់ទៅកាន់ទីក្រុង Shenzhen ។ ការធ្វើដំណើរតាមផ្លូវដែកនេះចំណាយពេលត្រឹមតែ១២ម៉ោងប៉ុណ្ណោះ។ ដោយឡែក នៅរយៈពេលប៉ុន្មានឆ្នាំចុងក្រោយនេះ កំណើនដ៏ខ្លាំងក្លានៃសេដ្ឋកិច្ចរបស់ទីក្រុងត្រូវបានគេមើលឃើញយ៉ាងច្បាស់ ជាពិសេសនៅមុនការមកដល់នៃវិបត្តិកូវីដ ពោលគឺទៅដល់១៧ភាគរយ ឬច្រើនជាងកំណើនសេដ្ឋកិច្ចជាតិដល៉ទៅ២ដង ហើយបើទោះបីជាបច្ចុប្បន្នកំណើនសេដ្ឋកិច្ចសកល និងតំបន់ឯទៀតធ្លាក់ចុះក្តី ប៉ុន្តែ Haiphong នៅតែបន្តទទួលបានការរីកចម្រើនជាធម្មតា។

យ៉ាងណាក្តី សម្រាប់អាណត្តិថ្មីរបស់លោក Trump មានក្តីព្រួយបារម្ភថា រដ្ឋបាលរបស់លោកនឹងធ្វើការពិនិត្យឡើងវិញចំពោះសកម្មភាពពាណិជ្ជកម្មរបស់ទីក្រុង Haiphong និងវៀតណាម ជាមួយនឹងចិនពីព្រោះថា ទំនិញដែលអាមេរិកបានហាមប្រាម និងតម្លើងពន្ធពីចិន បែរជានៅតែមានកំណើននាំចូលទៅកាន់ប្រទេសវៀតណាមគឺប្រហាក់ប្រហែលនឹងកំណើនដែលទំនិញប្រភេទស្រដៀងគ្នានោះត្រូវបាននាំចេញទៅអាមេរិកដែរ។

នៅក្នុងវិដេអូស្រាវជ្រាវដោយ The Wall Street Journal អ្នកជំនាញជាច្រើនបានមើលឃើញថា ទីក្រុង Haiphong នឹងបន្តទទួលបានការវិនិយោគកាន់តែច្រើនបន្ថែមទៀត ហើយទោះក្នុងករណីដែលរដ្ឋបាលអាមេរិកដាក់សំពាធយ៉ាងណាក្តី ពីព្រោះថានៅពេលនេះ ទីក្រុង Haiphong ខ្លួនឯងបានបង្កើនសមត្ថភាពនាំចេញរបស់ខ្លួនច្រើនផ្សេងទៀតលើសពីគោលដៅអាមេរិកបូករួមទាំងចិន អឺរ៉ុប អាមេរិកខាងត្បូង ផងដែរ ដែលវាគ្រប់គ្រាន់នឹងអាចប្រកួតប្រជែងទៅនឹងការនាំចេញទំនិញទៅកាន់ទីផ្សារអាមេរិកតែម្តង៕