សង្ខេបបេសកកម្មដើម្បីសន្តិភាពនៅអ៊ុយក្រែនដោយមេដឹកនាំហុងគ្រីទៅកាន់៤ប្រទេសដែលជាតួអង្គសំខាន់បំផុត

ជម្លោះនៅអ៊ុយក្រែនបានឈានចូលមកដល់ឆ្នាំទី៣ទៅហើយ ខណៈដែលរុស្ស៊ីបន្តវាយលុកលុយបានទីតាំងជាច្រើនរបស់ប្រទេសអ៊ុយក្រែន និងបានធ្វើកំណែទំរង់តាមរយៈការបោះឆ្នោតធ្វើប្រជាមតិផ្តាច់ខ្លួនចេញពីរដ្ឋាភិបាលអ៊ុយក្រែនរួចរាល់ផងដែរ។

មិនទាន់បញ្ចប់នៅឡើយ សង្គ្រាមប្រឆាំងគ្នាទៅវិញទៅមកនៅតែបន្តទោះបីជាមានកិច្ចខិតខំសម្របសម្រួលជាច្រើនដើម្បីអាចបង្កើតបានជាកិច្ចព្រមព្រៀងសន្តិភាពសម្រាប់អ៊ុយក្រែនក្តីចាប់រាប់តាំងពីចិន, អាមេរិក, រុស្ស៊ី និងអ៊ុយក្រែនខ្លួនឯងផងដែរ។

យ៉ាងណាក្តី ក្នុងចំណោមកិច្ចខិតខំទាំងនោះគេសង្កេតឃើញមានបេសកកម្មចុងក្រោយមួយដែលគួរឲ្យចាប់អារម្មណ៍ជាងគេដែលធ្វើឡើងដោយមេដឹកនាំហុងគ្រី គឺលោកនាយករដ្ឋមន្ត្រី Viktor Orban។ តាំងតែពីដើមខែមក លោកបានបំពេញទស្សនកិច្ចជាបន្តបន្ទាប់ទៅកាន់គ្រប់ភាគីដែលជាតួអង្គសំខាន់ៗនៅក្នុងជម្លោះនៅអ៊ុយក្រែន។

កាលពីថ្ងៃទី២ ខែកក្កដា លោក Orban បានចុះចតដល់ទីក្រុងគៀវ និងបានជួបសម្ដែងការគួរសម និងបានពិភាក្សាដោយផ្ទាល់ជាមួយនឹងប្រធានាធិបតីអ៊ុយក្រែន លោក Vladimir Zelensky ហើយត្រូវបានគេចាត់ទុកថាជាដំណើរទស្សនកិច្ចលើកដំបូងរបស់មេដឹកនាំហុងគ្រីទៅកាន់អ៊ុយក្រែនចាប់តាំងតែពីពេលដែលជម្លោះបានផ្ទុះឡើងកាលពីឆ្នាំ២០២២។

នៅទីនោះ លោកបានខិតខំពន្យល់អំពីផលលំបាកប្រសិនបើជម្លោះនៅតែអូសបន្លាយបែបនេះ ប៉ុន្តែជាលទ្ធផល លោក Orban បានអះអាងថា ដោយសារតែបទពិសោធដែលលោក Zelensky ធ្លាប់ទទួលបានកន្លងមកពីបទឈប់បាញ់គ្នា ម្ល៉ោះហើយចំពោះសំណើទាំងឡាយរបស់លោក Orban ដើម្បីបង្កើតបទឈប់បាញ់ថ្មី និងការកសាងកិច្ចព្រមព្រៀងសន្តិភាពនោះគឺពុំសូវជាទទួលបានផលល្អឡើយ។

នៅរយៈពេលប៉ុន្មានថ្ងៃបន្ទាប់ លោក Orban ក៏បានធ្វើដំណើរទៅដល់ទីក្រុងមូស្គូម្តង ហើយបានជួបពិភាក្សាជាមួយនឹងមេដឹកនាំរុស្ស៊ី លោកប្រធានាធិបតី Vladimir Putin ក្នុងគោលបំណងដូចគ្នាគឺដើម្បីអាចបង្កើតឲ្យបានជាកិច្ចព្រមព្រៀងសន្តិភាពមួយនៅអ៊ុយក្រែន។

ទោះបីជាទទួលបាននូវពាក្យរិះគន់ពីសមាជិកអឺរ៉ុបជាច្រើនចំពោះដំណើរទស្សនកិច្ចលើកនេះក្ដី ប៉ុន្តែ លោក Orban ហាក់ដូចជាមិនសូវខ្វាយខ្វល់ឡើយដោយលោកលើកឡើងថានេះមិនមែនជាដំណើរទស្សនកិច្ចតំណាងឲ្យសហភាពអឺរ៉ុបនោះទេ។

ចំពោះលទ្ធផលយ៉ាងណានៃកិច្ចប្រជុំ លោកមិនបានលម្អិតនោះទេ ប៉ុន្តែលោកបានបញ្ជាក់ថា ភាពចាំបាច់ដែលភាគីអ៊ុយក្រែន និងរុស្ស៊ីត្រូវតែចូលរួមគ្នាក្នុងការសម្រេចឲ្យបាននូវបទឈប់បាញ់ និងឈានទៅរកកិច្ចព្រមព្រៀងសន្តិភាព។

រំលងគ្នាបាន២ថ្ងៃ មេដឹកនាំហុងគ្រីក៏បានបន្តធ្វើដំណើរមកដល់ទីក្រុងប៉េកាំងដែលនៅទីនេះលោកបានជួបជាមួយនឹងប្រធានាធិបតីចិន Xi Jinping និងបានគូសបញ្ជាក់ថាវាគឺជាដំណើរបេសកកម្មដែលលោកបានចាត់ទុកថាជាបេសកកម្មសម្រាប់ស្វែងរកសន្តិភាព ឬ Peacekeeping Mission។

លោក Orban បានថ្លែងទៅកាន់លោក Xi ថា ៖ ចិនគឺជាតួអង្គដ៏សំខាន់ និងមានឥទ្ធិពលបំផុតក្នុងការបង្កើតឲ្យបាននូវលក្ខខណ្ឌសម្រាប់កិច្ចព្រមព្រៀងសន្តិភាពនៅអ៊ុយក្រែន។នេះគឺជាមូលហេតុដែលនាំឲ្យខ្ញុំត្រូវតែធ្វើដំណើរមកកាន់ទីនេះដើម្បីជួបជាមួយនឹងលោក Xi ។

ដូចគ្នាដែរ លទ្ធផលលម្អិតនៃជំនួបរវាងមេដឹកនាំទាំងពីរគឺមិនបានបញ្ជាក់នោះទេ ប៉ុន្តែជឿជាក់ថា លោក Orban គឺបានពណ័៍នានូវកិច្ចសន្ទនាគ្នារបស់លោកជាមួយនឹងមេដឹកនាំអ៊ុយក្រែន និងមេដឹកនាំរុស្ស៊ីទាំងអស់ជូនទៅកាន់លោក Xi រួចទៅហើយ។

ចុងក្រោយនេះលោក Orban កាលពីថ្ងៃចន្ទដើមសប្តាហ៍នេះបានប្រកាសអំពីផែនការបំពេញទស្សនកិច្ចទៅកាន់សហរដ្ឋអាមេរិកដែលជាគោលដៅចុងក្រោយសម្រាប់បេសកកម្មសន្តិភាពនៅអ៊ុយក្រែនលើកនេះ។

គួរឲ្យដឹងដែរថា ហុងគ្រីគិតត្រឹមខែកក្កដានេះបានចាប់ផ្តើមកិច្ចការងាររបស់ខ្លួនក្នុងនាមជាប្រធានប្តូរវេនរបស់សហភាពអឺរ៉ុបសម្រាប់រយៈពេល៦ខែក្រោមយុទ្ធនាការសំខាន់ផ្តោតទៅលើការធ្វើឲ្យអឺរ៉ុបត្រឡប់ទៅរកភាពអស្ចារ្យឡើងវិញ ឬ Make Europe Great Again៕