កម្ពុជា - ចិន ចុះអនុស្សរណៈជំរុញទំនាក់ទំនងសេដ្ឋកិច្ច និងលើកកម្ពស់ពាណិជ្ជកម្ម និងបង្កើនការវិនិយោគ

ភ្នំពេញ៖  អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា (CCC)  និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា បានចុះអនុស្សរណៈយោគយល់គ្នា ជាមួយនឹងសហព័ន្ធឧស្សាហកម្ម និងពាណិជ្ជកម្មចិន (ACFIC) ក្នុងគោលបំណងចូលរួមចំណែកជំរុញទំនាក់ទំនងសេដ្ឋកិច្ច និងលើកកម្ពស់ពាណិជ្ជកម្ម កិច្ចសហប្រតិបត្តិការ ដើម្បីពង្រឹងទំនាក់ទំនងវិនិយោគរវាងប្រជាជាតិទាំងពីរកាលពីថ្ងៃទី២៧ ខែឧសភា ឆ្នាំ២០២៤។

ក្នុងឱកាសនៃជំនួបពិភាក្សានេះ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានស្វាគមន៍យ៉ាងកក់ក្តៅចំពោះដំណើរទស្សនកិច្ចរបស់គណៈប្រតិភូចិនសៀងហៃ ដែលដឹកនាំដោយលោក ស៊ូ ហ្ស៊ីស៊ិ (Shou Ziqi) ប្រធានសហព័ន្ធឧស្សាហកម្ម និងពាណិជ្ជកម្មសៀងហៃ និងជាអនុប្រធានសហព័ន្ធឧស្សាហកម្ម និងពាណិជ្ជកម្មចិនទាំងអស់ (All-China Federation of Industry and Commerce) ដែលដឹកនាំគណៈប្រតិភូចិនសៀងហៃបំពេញទស្សនកិច្ចនៅកម្ពុជា ឆ្លុះបញ្ចាំងពីចំណងទាក់ទងដ៏រឹងមាំរវាងកម្ពុជា-ចិន ដែលមានចំណងកាទូតនឹងគ្នាតាំងពីឆ្នាំ១៩៥៨ មកម្ល៉េះ។

អ្នកឧកញ៉ាប្រធាន បានបញ្ជាក់ថា សភាពាណិជ្ជកម្មកម្ពុជា តែងតែសហការយ៉ាងជិតស្និទ្ធជាមួយភាគីចិន ហើយជំនួបពិភាក្សានាពេលនេះនឹងជួយពង្រឹងទំនាក់ទំនងល្អប្រសើរថែមមួយកម្រិតទៀត ជាពិសេស ការចុះអនុស្សរណៈយោគយល់គ្នារវាងស្ថាប័នទាំងពីរ។

ជាការកត់សម្គាល់ថ្មីៗនេះ នៅក្នុងអំឡុងពេលដំណើរទស្សនកិច្ចផ្លូវការរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅសាធារណរដ្ឋប្រជាមានិតចិន រដ្ឋាភិបាលប្រទេសទាំងពីរបានប្តេជ្ញាសម្រេចឱ្យបាននូវវិបុលភាពរួម និងផ្តោតជាសំខាន់លើក្របខ័ណ្ឌកិច្ចសហប្រតិបត្តិការត្បូងពេជ្រ លើវិស័យអាទិភាពចំនួន ៦ រួមមាន៖ កិច្ចសហប្រតិបត្តិការនយោបាយ គុណភាពនិងសមត្ថភាពផលិតកម្ម វិស័យកសិកម្ម ថាមពល សន្តិសុខ និងការផ្លាស់ប្តូរប្រជាជន និងប្រជាជន។

អ្នកឧកញ៉ា គិត ម៉េង បានជំរុញលើកទឹកចិត្តវិនិយោគិនចិនបណ្តាក់ទុនវិនិយោគបន្ថែមនៅកម្ពុជា ដែលជាទីតាំងដ៏សមស្របបំផុត ដោយកម្ពុជាមានកំណើនសេដ្ឋកិច្ចខ្ពស់ មានស្ថិរភាពនយោបាយ កម្លាំងពលកម្មវ័យក្មេង ថ្លៃដើមមានលក្ខណៈប្រកួតប្រជែង មានទីតាំងភូមិសាស្ត្រនៅចំកណ្តាលអាស៊ានដែលមានទីផ្សារធំទូលាយនៅទូទាំងពិភពលោក និងមានបរិយាកាសធុរកិច្ចល្អប្រសើរ។ សភាពាណិជ្ជកម្មកម្ពុជា ​នឹង​ធ្វើការ​រួមគ្នា​ដើម្បី​រៀបចំ​ព្រឹត្តិការណ៍​ផ្គូផ្គង​ពាណិជ្ជកម្ម​ ​គណៈប្រតិភូ​ពាណិជ្ជកម្ម​ ​និង​វេទិកា​វិនិយោគ​ ​ការ​តភ្ជាប់​អាជីវកម្ម​ ​និង​លើក​ក​ម្ពស់​ភាពជា​ដៃគូ​ដែល​មាន​សក្តានុពល​។​

លោក ស៊ូ ហ្ស៊ីស៊ិ ថ្លែងអំណរគុណយ៉ាងជ្រាលជ្រៅចំពោះ អ្នកឧកញ៉ា គិត ម៉េង ដែលបានទទួលជួបពិភាក្សាការងារជាមួយគណៈប្រតិភូសហព័ន្ធឧស្សាហកម្ម និងពាណិជ្ជកម្មសៀងហៃ និងសម្តែងនូវការកោតសរសើរចំពោះ សភាពាណិជ្ជកម្មកម្ពុជា ក្នុងការចូលរួមជំរុញពាណិជ្ជកម្មនិងវិនិយោគរវាងប្រទេសទាំងពីរ និងបានគូសបញ្ជាក់អំពីទំនាក់ទំនងមិត្តភាព និងចំណងកាទូតប្រទេសទាំងពីរ។

លោក Shou Ziqi បានគូសបញ្ជាក់អំពីទំនាក់ទំនងល្អរវាងរដ្ឋាភិបាលនៃប្រទេសទាំងពីរ ដោយសង្កត់ធ្ងន់ថា កម្ពុជាមានសក្តានុពលសម្រាប់ការវិនិយោគលើវិស័យសំខាន់ៗដូចជា កសិកម្ម ហេដ្ឋារចនាសម្ព័ន្ធ ទេសចរណ៍ និងកាម្មន្តសាល។ ភាគីទាំងពីរក៏បានលើកឡើងពីទំនាក់ទំនងសេដ្ឋកិច្ចរវាងកម្ពុជា និងចិនដែលកំពុងកើនឡើងផងដែរ។

ការចូលរួមរបស់សហព័ន្ធឧស្សាហកម្ម និងពាណិជ្ជកម្មសៀងហៃ ក្នុងការជំរុញកំណើនសេដ្ឋកិច្ចជាតិ ដែលមានសមាជិកជាង១០ម៉ឺនក្រុមហ៊ុន។ គណៈប្រតិភូសៀងហៃដែលមកបំពេញធុរកិច្ចនៅកម្ពុជា រួមមានក្រុមហ៊ុនផលិតម៉ាស៊ីនបូមទឹក ក្រុមហ៊ុនផលិតសម្ភារៈវេចខ្ចប់ ក្រុមហ៊ុនផលិត​ផលអា​ហារសម្រន់ និងក្រុមហ៊ុនគ្របគ្រងអចលនទ្រព្យ តំបន់ឧស្សាហកម្ម និងសេវាកម្មវិនិយោគ។

គួរបញ្ជាក់ដែរថា ប្រទេស​ចិន ​គឺជា​អ្នក​រួមចំណែក​ដ៏​សំខាន់​ក្នុង​ការ​អភិវឌ្ឍន៍​សេដ្ឋកិច្ច​សង្គម​ ​និង​ការ​កាត់បន្ថយ​ភាព​ក្រីក្រ​របស់​កម្ពុជា​។​ ​ប្រទេស​ចិន​គឺជា​ប្រភព​ដ៏​ធំបំផុត​នៃ​ការ​វិនិយោគ​ផ្ទាល់​ពី​បរទេស​ (​F​DIs​) ​មកកាន់​ប្រទេស​កម្ពុជា​ ​ដែល​ស្មើនឹង​ ​៤​២​ ​ភាគរយ​នៃ​ ​F​DIs​ ​សរុប​ក្នុង​ឆ្នាំ​២​០​២​៣​។​ ការ​វិនិយោគ​របស់​ចិន​បាន​ដើរ​តួនាទី​យ៉ាងសំខាន់​ក្នុង​ការ​រីក​ចម្រើន​សេដ្ឋកិច្ច​នា​ពេលថ្មីៗនេះ​របស់​កម្ពុជា​ ​ដែល​រួមចំណែក​ដល់​ការ​អភិវឌ្ឍន៍​ហេ​ដ្ឋា​រចនា​ស​ម្ព័ន្ធ ​ការ​បង្កើត​ការ​ងារ​ ​និង​រំហូរ​ចូល​នៃ​មូលបត្រ​បរទេស​។​

ប្រទេស​ចិន​ក៏​ជា​ដៃគូ​ពាណិជ្ជកម្ម​ដ៏​សំខាន់​របស់​កម្ពុជា​ ​និង​ជាទី​ផ្សារ​សក្តានុពល​មួយ​សម្រាប់​ផលិតផល​កម្ពុជា​។​ ​មហាអំណាច​សេដ្ឋកិច្ច​ទីពីរ​របស់​ពិភពលោក​មួយនេះ​ ​ក៏​ជា​អ្នកផ្តល់​ជំនួយ​អភិវឌ្ឍន៍​ផ្លូវការ​ (O​D​A​) ​ធំ​ជាងគេ​ដល់​កម្ពុជា​ផង​ដែរ​។​